WILLEMSTAD.- No opstante ku hopi dje kontagionan e último tempu ta prosedente di grupo di hóben, tòg por bisa di otro banda ku hóbennan di 12 aña i mas ta basta konsistente pa loke ta trata nan vakunashon. For di datonan ku nos a optené di un rapòrt di RIVM por konkluí ku tin un grupo ku a disidí di bai vakuná, i ku tempu nan ta kumpli ku esei tambe kasi kompletamente.

Den e relato aki a tuma e porsentahe di habitantenan di 12 aña i mas bieu ku a pasa por lo ménos un angua di vakunashon. Pa loke ta e isla di Kòrsou unda a kuminsá registrá e kantidat for d luna di mart 2021, por bisa ku e tabata na satisfakshon. Esei pa motibu ku si wak e registro, a kuminsá na luna di mart, i na yüli ya el a yega 50 porshento pa loke ta esnan ku a risibí un angua di vakunashon.

Mas aleu si wak e komportashon pa loke ta e di dos angua, un kantidat kasi similar a bai tuma nan di dos vakuna. Den luna di aprel tabatin un diskrepansia grandi kaminda un 48% a bai tuma nan promé angua, pero pa e di dos angua si e reakshonnan tabata desepshonante.

Pero den e siguiente lunanan esaki a bin rekuperá tereno, i asina na yüni esnan ku dos angua a yega un 46 porshento.

Pa loke ta e otro islanan den Reino, remarkabel ta ku den prinsipio e ta start ku furia; den aprel el a floha un tiki, pero e siguiente lunanan el a kue tereno bèk i asina por bisa ku un porsentahe basta haltu a risibí nan di dos vakuna. E grupo aki ta hopi inkliná na tuma tur dos angua.

Di otro banda mester bisa ku den e mesun relato aki RIVM ta bisa ku e ta basta preokupá ku e situashon di COVID-19 aki na Kòrsou. E entidat ta konsiderá e situashon den kual tin un oumento den e kantidat di kaso di kontagio komo “alarmante”. Den e publikashon di ayera pa loke ta e situashon di COVID-19 den e parti Karibense di Reino ta mustra ku no ta solamente Kòrsou sino ku e tendensia di un subida ta visibel serka e otro islanan tambe.

Segun RIVM, e kantidat di infekshon ta subiendo na e Islanan-BES. Prueba di esei ta ku den e siman di 15 pa 21 di yüli 2021 un kantidat di 646 persona a haña resultado positivo riba e islanan, di kual mayoria tabata na Kòrsou i Aruba.