WILLEMSTAD.- Un grupo di 32 pasahero pega na Venezuela fo’i ora Covid-19 a kai aden a manda karta pa promé minister Rhuggenaath kaminda nan ta pidi pa yuda nana regresá Kòrsou. Di e grupo aki 27 ta venezolano pero residensia legalmente na Kòrsou, 4 ta ulandes i un ta di nashonalidat spañó pero tambe residensia na Kòrsou.

Segun nan karta, nan ta na Venezuela for di promé ku e pandemia mundial na luna di mart ku despues a bira karentena nashonal dia 13 di mart pa 30 dia pero a dura te awe.

Nan ta splika ku ta imposibel pa nan regresá Kòrsou kaminda nan tin nan kas pa hopi aña kaba kaminda nan tin nan bida profeshonal, nan ta traha, sosialisá i tin nan famia inkluyendo asta menornan di edat. Nan ta roga promé minister den e karta pa nan regresá Kòrsou pa nan por reuní ku nan famia, kual ta un derechi humano ku nan tin.

Dia 12 di yüni e aña aki a tuma lugá un buelo humanitario for di Maiquetia te Kòrsou ku e kompania Estelar ku parse ta ofisina di turismo di Kòrsou a organis'é den kolaborashon ku embahada ulandes na Caracas. Tabata un buelo pa pasaheronan ku ta den mesun kondishon ku nan (e 32 pasaheronan). Parse ku na tambe tabata inkluí riba e lista pa bula dia 11 di yüni pero un dia promé nan ta haña yamada kaminda nan ta keda informá ku nan no ta kumpli e rekisitonan pa e fin menshoná.

For di e fecha ei segun e pasaheronan, nan a hasi diferente petishon i a dirigí nan mes na diferente ofisial tantu na Venezuela komo Kòrsou pa por realisá un buelo charter pa nan por repatriá pa Kòrsou i por kontinuá ku nan bida.

Den e kuadro ei nan ta roga promé minister pa e por atendé i outorisá nan petishon pa asina instansianan konserní nan por keda yuda pa por regresá Kòrsou. Ya e grupo a hasi tantísimo petishon na representashon diplomátiko di Kòrsou na Venezuela pero nan ta tende einan ku ta outoridatnan di Korsou mester tuma e inisiativa pa outorisá Venezuela via di nan representante diplomátiko pa por organisá e buelo charter pa e grupo por repatriá bek tantu e ulandesnan komo e venezolanonan residensia na Kòrsou.