WILLEMSTAD.- Hopi biaha nos ta tende notisia negativo so di nos hóbennan aki na Kòrsou i ora algu positivo mes pasa, kasi nunka esaki ta bini den lus.

Apesar ku tabata den un momentu tristu pa un famia, EXTRA kier a pone atenshon i trese den un lus positivo un grupo di hóben di e área di Habaai.

Ayera durante di un eksploshon ku a surgi na Habaai, e grupo di hóben riba e foto ku ta hóbennan di bario mes kual a tuma nota i presensiá e eksploshon a tuma riba nan mes di drenta den e kas ku tabata parsialmente na kandela i a skapa bida di e dama tresiendo e dama pafó. Alabes e hóbennan a kuminsá tira awa i tera pa por skapa e kas di kima por kompletu. E hóbennan a hasi tur esaki sin tene kuenta ku nan propio bida tabata na peliger.

Ta un akto sigur pa aploudí di parti di e grupo di hóben aki.