WILLEMSTAD.- En total 17 persona resientemente a entrega keho kontra un dama di 27 aña ku a keda arestá dia 5 di yüli. Segun e grupo di  persona ta trata di un kaso di estafa hopi alarmante ku tin di aber ku bestèlmentu di vehíkulo for di Hapon.

Polis a splika ayera ku dia 5 di Yüli a detené e dama, Z.E.R.L. nasé na Kòrsou di 27 aña di edat, na Warda di Reshèrshi Rio Canario.

‘Su detenshon ta relashoná ku un kantidat di keho ku klientenan a hasi di estafa (pa asuntu di bestèl vehíkulo for di eksterior) i falsifikashon di dokumentu kontra di e dama sospechoso menshoná. A presentá e sospechoso dilanti un fiskal ouksiliar ku a ordená su enkarselashon pendiente

pa mas investigashon.’

Un di e víktimanan di e supuesto estafado ta splika e siguiente: ‘Ta trata di e kompania ku ta yama CuraJDM. Nan ta bestèl outo fo’i Hapon. E kompania ta basta konosí i a bestèl mas ku 500 outo kaba.’

E grupo di hende ku ta rabia ta splika ku nan a skohe pa CuraJDM, pasobra den pasado hopi hende tabatin bon eksperensia ku e kompania. Pero resientemente kosnan no a sali manera  mester ta. ‘Nos a skohe nos outo, nos a paga pa nos outo na e dama konserní. Tin hende ku a paga kèsh, tin hende ku a manda sèn riba un kuenta. Tin hende ku a paga e preis kompletu, tin ku a paga mitar.’ Ta trata di montantenan entre 5000 i 15.000 Naf pa persona. Despues di pagamentu ta haña for di dama L. un number di ‘BF’ for di Hapon, kua ta e modèl di outo. Despues nada a pasa. ‘Nos tur a hasi pago  den e promé lunanan di e aña aki. Te ainda nos ta warda  riba nos outo. Pero nos no a haña nada. Nos a yama e kompania na Hapon, pa check na unda nos outo a keda, kiko a pasa ku e transporte. I ki dia e transporte ta yega Kòrsou. Nos a haña kontesta ku outonan a wòrdu bendí na otro pais manera Zambia i Zimbabwe. E kompania na Hapon ta splika ku nunka nan no a haña sèn pa e outonan.’ I ora e víktimanan a yama L. el a bin ku tur sorto di èksküs, tokante problema ku banko, problema ku transporte, problema ku su telefòn òf su mail ets. Awor e grupo di víktimanan konserní ta kontentu ku a detené L. pero nan ke sa kiko lo pasa ku e sèn ku nan a paga.