WILLEMSTAD.- Un grupo di profeshonal médiko for di Hulanda, ku a bin Kòrsou den e promé siman di Aprel pa yuda ku e pandemia di COVID-19, a regresá Hulanda den e wikènt último. Ta trata di un grupo for di sektor médiko i sektor di kuido na Hulanda.
Nan a mèldu nan mes boluntariamente pa bin yuda Kòrsou den kuadro di inisiativa ‘Extra handen voor de zorg’ (ku ta nifiká: ‘Mannan èkstra pa e kuido’). Ku esaki Hulanda a manda personal ku por a yuda na hospital i den trayekto di vakunashon di pueblo di Kòrsou kontra Corona. E inisiativa ta traha riba petishon di ministerio di Salubridat na Hulanda.
E grupo a yega Kòrsou djabièrnè 9 di aprel, nan a sali den e wikènt último. Riba página di Facebook di ‘Extra handen voor de zorg’ por lesa ku e partisipantenan ta hopi kontentu ku nan a duna un kontribushon den e lucha kontra COVID-19 na Kòrsou. Fin di Mart último gobièrnu di Kòrsou a duna di konosé ku e situashon den hospital CMC tabata hopi alarmante. Den e periodo Kòrsou kada dia a konosé un fluho di pashèntnan di Corona nobo den hospital. Esaki a kousa basta problema. Na un dado momentu tabatin mas ku 4700 registrashon di kasonan aktivo na Kòrsou i mas ku 140 pashènt den hospital. Awor tin mas ku 148 kaso aktivo i 31 hende den hospital.
Na otro banda Kòrsou a pèrdè basta pashènt ku COVID-19 den e último seis siman. Awor nos konosé 116 pashènt di Corona ku a fayesé. Esaki ta nifiká ku den e último seis siman 83 pashènt ku Corona a fayesé.
E hulandesnan ku a bin yuda Kòrsou ta wak bèk riba un aventura hopi bunita na unda nan a yuda pueblo di Kòrsou den tempu di nesesidat. Riba página di Facebook por lesa relatonan positivo so. No ta konosí ainda si tur profeshonal médiko a disfrutá nan trabou na Kòrsou. Pero segun mayoria di nan e tabata un eksperensia hopi bunita. Manera dòkter di kas Carlijn van Gils ta bisa den un entrevista ku korant ‘Eindhovens Dagblad’: ‘Esaki tabata un eksperensia hopi spesial. Mi ta hopi kontentu ku mi a tuma desishon pa yuda. I den futuro mi ke bai bèk Kòrsou, pero komo turista.’