WILLEMSTAD.-Awe mainta un grupo di taksista a bai ofisina di minister di Tráfiko, Transporte i Planifikashon Urbano (VVRP) na seru di Ararat pa entrega un karta na minister Charles Cooper.

E representante di e grupo a splika ku entre e puntonan di mas importante ta ku e proyekto di lei nobo ku tin riba mesa pa kambio di transporte públiko no ta kumbiní e taksista independiente. Nan splikashon ta ku bou di e lei nobo kada taksista lo risibí pèrmit pa sinku taksi den su kompania. Esaki ta nifiká ku e

merkado lo bira un merkado liber i e hendenan lo no sali benefisiá. Ta solamente esnan ku ta den grupo huntu lo benefisiá di e plan aki.

Entre e puntonan negativo e representante a duna di konosé ku nan lo konfrontá problema di preis, tambe nan lo mester warda hopi pa un kareda, e trabou komo shofùr ouksiliar no ta bai eksistí mas pasobra den futuro tur mester bira trahadó di e grupo/kompania pues nan no por traha komo shofùr ousiliar i warda e momentu ku nan mes por bira doño di nan pèrmit. Ademas e servisio lo kambia di unu personal pa unu komo kompania. Taksistanan ta duna bon servisio na Kòrsou, asina e representante a duna di konosé.

Ademas e grupo ta di opinion ku e lei nobo lo limitá entrada di e taksista independiente. E taksista su so mester kompetí hopi fuerte ku e grupo òf kompania. E lei nobo no ta benefisiá e taksista. Mas detaye den edishon di EXTRA.