WILLEMSTAD - Tin un situashon sumamente peligroso i volátil ta desaroyando na momentu ku EXTRA a tuma nota e siman aki ku gruponan rival, inspirá pa polítika ta kla pa topa otro mano a mano. Presidente di Staten Humphrey Davelaar, mucha di Bándariba, a konfirmá ayera ku ta trata di un situashon sumamente serio.

Banda di e tumulto polítiko ku tabatin e siman aki den Staten a desaroyá un otro aspekto ku mester bai tene kuenta kuné. Un grupo di Bándariba ku ta sostené Davelaar i e aktivista nashonalista di e bario Elvin Gerard a disidí ku nan no ta tuma mas. Nan a kaptá ku durante e reunion e siman aki a manda yen di insulto den direkshon di Davelaar. Nan a graba tur kos i nan a analisá ken ta ken. Nan a identifiká gruponan di Koraal Specht i di Marchena ku a organisá for di tempran pa bai sostené oposishon. Ta e mesun hendenan ku den pasado tambe tabata sostené e kousa di Helmin Wiels i tabata presentá riba kaya òf den kualke reunion. Awor nan a bòltu bai e otro partidonan di oposishon, entre nan MFK i Kòrsou di Nos Tur. Riba su mes no ta un problema ku tin aktivistanan ku ta organisá i bai sea reunion òf manifestashon pero e diferensia e biaha aki ta ku a manda palabranan insolente i rasista den direkshon di Davelaar ku a guia e reunion. Entre otro a koba su mama ku por sierto ta un defuntu i tambe a yam’é makaku. Su simpatisadónan no a pèrdè pa gana i nan a kuminsá prepará pa defendé nan lidernan di Bándariba tur ku tin. Informashonnan ku EXTRA a haña ta bisa ku nan a bai reuní na un restorant riba Santa Rosaweg i a kuminsá prepará pa drenta den akshon. Tabatin bebementu tambe, segun nos informantenan loke a pone ku e kabesnan a bira mas kayente ainda. Tabata Gerard ku a intervení den e kaso aki anke e tabata komprondé e situashon kompletamente. Na un dado momentu esnan presente a eksigí pa Davelaar mes presentá. Davelaar ku tabata bayendo kas despues di e dia pisá a hañ’é fòrsá ta bai papia ku e grupo aki di mas o ménos 70 hende pa kalma nan. A tuma hopi trabou pa konvensé nan pa no hasi nada awor aki. Pero esnan presente a manda un señal kla ku nan no ta soportá mas ku ta insultá nan lidernan i lo ta kla pa drenta akshon na kualke momentu.

E situashon ku a presentá ta ilustrá kon tenso e situashon ta i kon desaroyonan polítiko tin su impakto pa e simpatisadónan tambe. Tin un lista ku nòmber ta sirkulando despues ku a analisá e grabashonnan loke ta hasi e situashon mas serio ainda. E desaroyonan aki tabata un di e motibunan tambe ku a para e reunion di ayera anke ku oposishon a anunsiá ku nan lo no ta presente. Davelaar a konfirmá ayera ku el a pidi refuerso adishonal pa e reunion di e siman aki pero e no a haña e refuerso aki pa kua awor aki tin un investigashon profundo ta tumando lugá pa e manera ku kosnan a desaroyá. Davelaar a ripití tambe ku e no tin miedu i lo sigui kana tur kaminda manera el a bin ta hasi semper. “Mi ta hende di pueblo”, asina el a bisa.