WILLEMSTAD.- Direktiva di Skolnan Katóliko ta kla pa start aña eskolar 2020-2021. Solamente ta algun instrukshon nan tin di haña den e normal nobo di parti di gobièrnu, asina direktor di Direktiva sra. Lisette van Lamoen-Garmers a duna di konosé na EXTRA.
E aña aki no tin konferensia grandi manera tabata sosodé tur aña. Ora e situashon di covid a kuminsá, tabata nèt e temporada ku direktiva ta kuminsá prepará pa e konferensia i nan tabata poko konfuso, spesialmente pa aglomerashon di 1200 hende. E kantidat di dosente huntu tòg ta eksigí pa tene distansia sosial. A duna skolnan oportunidat pa skolnan mes tene an konferensia.
Semper direktiva ta tene e konferensia grandi i despues skolnan mes ta hasi nan konferensia. Nan por hasi 1 te 2 konferensia.
Mas aleu sra. van Lamoen-Garmers a bisa ku skolnan ta prepará duru pa aña eskolar nobo aki. Djabièrnè skolnan a haña e sirkulario ku ta bisa nan kon skol tin di habri. Den dje a bira kla ku no mester tene kuenta ku distansia sosial na skol di fundeshi, ni sekundario. Pero si adultonan mester tene kuenta distansia sosial. Skolnan ta prepará kon ta organisá klasnan.
Mester tene kuenta ku esnan ku ta afó na Aruba. Ta spera ku e hende mes ta konsiente ku e mester bai karentena.
Direktiva di Skolnan Katóliko ta sperando di gobièrnu instrukshon kon tin di atendé ku hende ku bin for di Aruba.
E direktor a sigui bisa ku ta bon pa gobièrnu anunsiá for di kua pais ku ta di rísiko, i ku e hende mester tuma karentena di 2 siman. Direktiva ta spera riba e lista di parti di gobièrnu pa anunsiá skolnan.
Igualmente ta warda riba gobièrnu pa haña instrukshon kon skolnan tin di kuminsá nan aña eskolar. Hopi skol ta tene dia di introdukshon of ta bai misa. Direktiva a pidi gobièrnu klaridat kon nan tin di atendé ku esaki, i ta sperando riba kontesta di parti di gobièrnu.
Pa loke ta trata kapasidat di maestronan di skol, sra. van Lamoen-Garmers a duna di konosé ku pa Enseñansa di Fundeshi ainda tin algun vakatura. Te ku wikènt tabatin 5 vakatura. Enseñansa di fundeshi ta keda reto pa Direktiva di Skol Katóliko pa yena vakatura. Pa otro tipo di enseñansa na nivel sekundario, mester a laga algun hende bai dor ku muchanan ta bahando pa sierto vak na skolnan i e kantidat di muchanan na skol tambe ta bahando. A baha algun ora. A purba di hasi asina pa no mester baha hende. a hasi e ehersisio aki te kaminda e ta responsabel. I tin algun otro vak manera hulandes, vaknan tékniko ku ainda tin vakatura riba nan i ta trahando duru riba dje pa yena esakinan.
Debí na covid, 1 dosente so a bin for di eksterior.
Pa loke ta trata skolnan ku ta den konstrukshon, na St. Joris School, grupo 1, 2 i 3 no por kuminsá djaweps awor, dor ku ta kabando ku konstrukshon. Direktiva di Skolnan Katóliko a haña pèrmit di minister pa grupo 1, 2 i 3 por keda kas, i djaluna nan ta kuminsá. Tur otro skol por kuminsá normal, sra. Lisette van Lamoen-Garmers a duna di konosé.