Girigorie:

WILLEMSTAD.- No por ta asina ku ta dura entre 3 siman pa 1 luna promé ku Obranan Públiko solushoná problema ku kloaka den bario. Esaki ta kousa di situashonnan ahigiéniko ku ta un menasa pa salú di hende. No solamente tin ku biba simannan largu den un holó stinki, pero tambe famianan tin problema pa usa baño i awa di kloaka ku ta kore den kaya ta potensial kousa di plaga di insekto.

Miembro di partido Nashonal di Pueblo, Norman ‘Nooi’ Girigorie den deklarashon pa EXTRA ta bisa ku habitantenan di Seru Papaya a aserká su persona ku problema ku kloaka den e bario. Ta trata di habitantenan di 2 diferente kaya ku ta mèldu e problema. “Nan ta sklama pa ousilio, pasobra nan no por kontinuá den e situashon akí”, Girigorie ta deklará.

Ta trata di Kaya Halo i Kaya Áwaseru. Girigorie ta bisa ku den pasado tabata asina ku ta yama Obranan Públiko i den 48 ora tabata remediá e tipo di situashonnan akí. Hopi biaha ta trata di un ret di kloaka ku a blòkia i mester laga un trùk spesial (“vacuumtruck”) chupa esaki i saka e shushinan ku a pega den e ret di tuberia.

Pero segun Girigorie tin entendé, aworakí por dura entre 3 siman pa 1 luna promé ku Obranan Públiko atendé ku e tipo kehonan akí. Esaki tin entre otro di aber, Girigorie ta sigui bisa, ku un otro prosedura ku a introdusí pa atendé ku e tipo di kehonan akí.

Na opinion di e miembro di PNP sinembargo kambionan mester resultá den mehorashon di e servisio ku ta duna i no kontrali, esta ku e servisio ta bira mas pésimo. “No por trata habitantenan di Seru Papaya di e forma akí. Nan meresé trato igual meskos ku ta duna den tur otro bario.”

Girigorie ta sigui bisa ku ta dura muchu largu pa remediá e problema ku kloaka den e bario. “Mi ta hasi un apelashon riba e instansianan konserní pa remediá e situashon akí mas lihé ku ta posibel.

Banda di Seru di Papaya tin diferente otro bario na Kòrsou ku tin e mesun problema ku kloaka. Otrobanda, Dòmi Ariba, Ronde Klip, Sapaté i Brievengat djis pa menshoná algun. Un di e problemanan ta ku mayoria doñonan di trùk no ke traha pa Obranan Públiko a base di e tarifa ku ta paga.

Nan ke un oumento di tarifa. Tambe ta reklamá ku ta dura largu promé ku paga pa e servisio ku ta duna.

Foto:

...Norman Girigorie...