WILLEMSTAD.- Direktiva di sindikato STSK a tuma nota di anunsio di Minister Croes, komo e titular di enseñansa, kaminda ta anunsiá ku den deliberashon i konsulta ku instansianan i organisashonnan manera inspekshon di enseñansa, departamento di epidemia, hefe di kalamidat, ministerio di enseñansa, direktivanan di skol, sektor direktor i sindikato, nan a yega na e desishon ku entrante 13 di aprel awor, lo kuminsá habri skol i sigun dianan ta sigui lo sigui ku esaki tantu físiko i riba distansia pa sierto skolnan. STSK ta kompletamente di akuerdo ku e mucha i alumno tin derechi riba edukashon, i mester di esaki pa su desaroyo, pero den un ambiente safe i responsabel pa su mes i sobra nan den su bisindario, STSK komo sindikato ku ta representá trahadó ku ta laborá den skol, na niun momento so a wòrdu aserká pa asina skucha sigur nan opinion, konseho i opservashon pa ku e situashon aktual.

Lutson Lucas ta sigui bisa ku na luna di mei di aña pasá 2020 gobiernu a hasi un inventarisashon di e situashon di COVID pa ku enseñansa, i a sali na kla for di e investigashon aki ku mester invertí i bini ku un maneho dirigí kon lo por sigui ku skol den e situashon di e pandemia aki, awe un aña despues nada nada a ser hasí riba e resultado di e investigashon aki, esta e maneho dirigí i tambe invershon den e parti logístiko di skol i tambe infrastruktura, entre otro sòru pa tin tur e produktonan pa ku higiena i tambe konekshon di internèt i infrastruktura pa por duna lès riba un distansia manera ta pidi pa hasi aktualmente.

STSK ku ta representá un kantidat respetá di trahadó den edukashon ta para pa siguridat di e alumno i personal nan ku ta laborá den skol, p’esei STSK lo keda splika i konsehá na miembronan i trahadónan den edukashon, sigun tratado nan internashonal i konforme nos areglo di estado, bo doño di trabou ta responsabel pa bo tin un bon ambiente di trabou, i tambe pa kaminda ta laborá, ta un lugá safe i sigur.

Ku esaki Lucas ta bisa ku nan ke bolbe señalá ku  komo representante di e trahadó, ta tumando nota ku den tur e pandemia i situashon ku pais ta pasando aden aktualmente, ku konsientemente doño di trabou ta eksponé su trahadónan pa por laborá den un ambiente di trabou ku no ta plasentero i safe pa nan salú, violando tur lei i regla.