WILLEMSTAD.- “Niun hende no ta sera Mavis Albertina su boka. Hamas por silensia Mavis”, asina e direktor di e planta di televishon Nos Pais Television, sra. Mavis Albertina, a deklará durante un enkuentro ku prensa ayera tardi. T’asina ku sra. Albertina durante e konferensia di prensa aki no a spar ni UTS ni su direktor sr. Paul de Geus di krítika. El a kulpa sr. De Geus personalmente pa e supuesto fayonan ku a ser kometé kontra su planta, i el a konsiderá esaki komo sabotahe, djis pasobra el a habri su boka i reklamá kosnan ku e tabatin derechi riba dje.

Sra. Albertina a splika ku e problemanan ta datá di basta tempu, aunke el a kue e fecha di 4 di yanüari 2017 riba kua UTS a sera e kanal di televishon. Ta un kibramentu di kabes ku el a bin ta konfrontá e último tres añanan, pues for di momentu ku Nos Pais Television a lanta. Si tin di konta e kantidat di dianan ku a saka e kanal for di aire, e lo akumulá na 5 pa 6 luna. Ta hopi reakshon tabata bini den e periodo ei, i tur hende tabata puntra dikon e kanal ta fo’i aire. Pero no tabatin un motibu válido, kosnan asina no por sosodé sin mas. Pero ku esaki el a bin komprondé kon “gustá” e ta. Mavis no por ser kumprá tampoko pasobra e no ta na benta!

Pero kisas televidentenan lo por bolbe sinti falta di kanal-4 atrobe, pero lo ta pa algun dia so, pasobra hamas lo silensiá Mavis Albertina. Durante 46 aña el a ehersé e trabou aki den media, i el a mira hopi bini i bai. I e ta sigur ku e lo mira mas na kaminda pa bai.

Segun Mavis, e historia di e televishon aki a kuminsá na 2014, i kontra konseho di tur hende ku e konosé, el a disidí di dal bai ku e proyekto tòg. Komo e kanal yama “Nos Pais Television”, su meta ta pa empoderá hende i hasi nan orguyoso di loke ta di nan. Ban karga nos kosnan. Komo un bon yu di Kòrsou el a opta pa hasi uso di servisionan lokal, i UTS ta esun prinsipal i ta p’esei el a opta pa tur konekshon di Internet, banda hanchu, telefòn etc. ta di UTS. Loke e ta propagá el a hasi tambe. Sinembargo ora ku e televishon mester a konta ku banda hanchu di kabel di fibra pa e por a transmití ku Definishon Haltu (HD), a bin tur sorto di splikashon pa hustifiká dikon esei no tabata posibel ainda.

Den su splikashon sra. Albertina no a spar eks Minister Earl Balborda, ya ku esaki tambe a forma parti di e kadena ku a bòikotiá e televishon. A dura komo 10 luna promé ku a yega asina leu pa e planta a haña su pèrmitnan. E ta haña ku e kadena ei mester ser kibrá na bon òf na malu.