WILLEMSTAD.- Tin hopi hende ta keha ku situashon ekonómiko na Kòrsou ta difísil i asta di preokupashon, sinembargo tin otronan ku tambe ta preokupá pero nan ta inovativo i kreativo. Esperamos Supermarket, un supermerkado ku tin hopi dékada na Kòrsou a kuminsá aseptá Bitcoin, esta e moneda virtual komo medio di pago. Ricardo Freitas di Esperamos Supermarket, den deklarashon na EXTRA a bisa ku hopi tempu pasa Kòrsou tabata grandi ku e inovashon di e tempu aya ku tabata Off Shore, e ta kere ku mester hiba Kòrsou e podio grandi atrobe meskos ku nos hóbennan di Senior League a hasi.

E empresario ta di opinion ku e komunidat aki mes mester hasi mas esfuerso pa pone nòmber di Kòrsou haltu den mundu atrobe. E dianan aki tur hende ta orguyoso di nos hóbennan di Senior League ku un biaha mas a pone Kòrsou su nòmber na haltu den mundu.

Den e mundu di teknologia tambe esei ta posibel, dikon Kòrsou no ta presentá su mes na mundu?

Den pasado Kòrsou tabata pionero den Off Shore, loke awendia ta konosí komo sektor finansiero internashonal. Ta un servisio ku nos por eksportá sin hasi muchu.

Segun Freitas, si nos ke pa e komunidat aki kuminsá kere realmente den Bitcoin komo moneda virtual mester kuminsá un kaminda. Dikon no kuminsá na un supermerkado? Tur hende mester kome i p’esei ta bai un supermerkado, einan ta mas fásil pa mustra komunidat ku e desaroyo di futuro ta na Kòrsou.

E gerensia di Esperamos Supermarket ta mira ku e komunidat aki ta unu chikí, pero tin posibilidat pa uso di e moneda virtual. Na di dos lugá, ta importante pa laga e hóbennan di awendia kuminsá mira i eksperensiá loke ta futuro, pasobra ta asina ta yuda e generashon nobo pa prepará pa futuro.

Na Ulanda e siudat ku ta propaganda mas uso di moneda virtual ta Arnhem. Tin Vários komersiante ku ta bende detal ku ta aseptá Bitcoin. E último desaroyo ta ku asta por kumpra Bitcoin na Schiphol, pues poko poko e ta drenta mas. Na opinion di Ricardo Freitas, ta e teknologia mester ta e parti importante pa Kòrsou.

Rísiko

Awor aki e balor di e moneda virtual ta hopi volatil i ta pone ku e supermerkado ta kore sierto rísiko. Freitas ta enfatisá ku si un empresa no tuma rísiko anto hamas nan lo sa kon mester adaptá pa bai dilanti.