WILLEMSTAD.- Awor aki tin gran mayoria di nos muchanan na kas ku no ta bai skol. Kiko lo hasi pa e muchanan ei no keda perhudiká pasobra nan no a bai skol. Lio Plantijn a bisa EXTRA ku semper tin programanan, fórmulanan ku trahadónan den enseñansa por traha pa reskatá loke a kai atras. I awor aki nan no ta hopi atras riba skema.

E presidente di SITEK Lio Plantijn a bisa ku e problema awor ta ku e trahadó ta den strès i tenshon i ni maske kua método duna, e no por traha tòg pasobra su konsentrashon no tei.

Plantijn a mustra riba e situashon aktualmente kaminda hende ta muri, yen hende infektá ku COVID. Tur eseinan ta kousa basta strès serka e trahadó den enseñansa tambe.

I p’esei e no ta di akuerdo ku nèt awor ku ta den e proseso di vakuna, awor ta manda e trahadónan den enseñansa bai traha. Mihó laga e proseso di vakunashon kana i kaba promé.

Asina e trahadó lo bai traha mas sigur i ku mas siguransa.

Banda di esaki e trahadónan den enseñansa  tin strès pasobra a bisa ku no ta paga sèn di fakansi. Esei tabata nan úniko insentivo den enseñansa. A primintí di kana e proseso di promoshon di dosente A pa B. Pa esei tambe SITEK ke sa kon leu e ‘landsbesluit’ ta. Ta for di 2005 ta warda riba esei tambe.

Ta parse ku enseñansa di Kòrsou no ta prioridat, pero ta keda usa manera krèsh pa warda e muchanan i pa asina e bida eifó por sigui. ‘I no mester trata nos hendenan asina ei. Mester probechá di e normal nobo i hasi enseñansa tambe e normal nobo. Ban laga e trahadónan pasa nan di dos vakuna i nan tin e fórmula kon ta hinka e asuntu aki den otro ku e muchanan no ta kai hopi atras den e ritmo”, segun Lio Plantijn.

E ta asta pensa ku por a posponé EFO pa luna di yüni. E muchanan ei no tin di bai afó tòg pa sigui studia.