Randal Corsen a studia músika na Ulanda i aktualmente e ta ful den e trabou musikal na Kòrsou. Randal e aña aki a gana promé finalista komo areglista pa Kòrsou ta den su Gloria, tumba ganadó ku e kantante Dibo Doran ku agrupashon musikal One Flavaz. Randal a habri su kas pa nos, sintá na su piano el a konta su eksperensia ku tumba i su trabou komo músiko.

“Hopi great i ta p’esei bo ta hasié. Si e tumba ganadó, abo por a bistié su bachi ku ta su areglo, si esei a pone i yuda ku e tumba a skor bon ta un satisfakshon masha grandi”, Randal Corsen reakshonando riba e sentimentu pa su areglo a forma parti di e tumba ganadó. Banda di esaki el a bisa ku tabata un areglo pa e tumba di Dibo Doran, ku tur hende a spera ku un dia e lo a bai ku e korona un dia. Djamars ora nan a toka segun Randal, e sentimentu pa ku e tumba aki tabata hopi bon. Promé nan tabata preokupá pasobra nan tabata e di dos banda. Pa kolmo un banda a kai afó i otro banda no tabatin ‘warm up’ i nan a sinti ku ta nan ta habri e anochi i realidat ta ku Festival Center ta hopi bashí e ora ei. Pero mirando kon e tumba a dal, a duna nan un mihó ‘feeling’ ainda. Promé kaba nan tabatin e ‘feeling’ aki ku e tumba i último dianan na ensayo Randal tabatin idea ku na tin un bon kos. E mes ta di tres aña ku tumba riba stage i no tin un trayektoria largu.

E djabièrnè final Dibo a kanta kasi 3 or di mardugá. Bo ta sintié na e públiko pero tòg e públiko a biba ku e tumba. Nan a trein masha bon i Randal asta por a drei wak patras kiko tabata pasando. “Nos tabata poko preokupá pasobra na kuminsamentu den e konteo algu kasi a bai fout. No e no a hasi diferensia i na kabamentu Dibo su stèm a sera for di emoshon i nan a baha stage ku poko duda”, Randal a bisa. E letranan di e tumba ta tremendo, ta un tumba fuerte. Ora e tumba a sali i mirando e reakshon di pueblo ta algu fantástiko. Randal a dun’é e areglo ku e ta kere e mester tin pa hasi un bon kos.

Mi tin di demostrá….

 

Esaki ta e di 10 partisipashon di Dibo Doran den festival di tumba. Randal ta konta kon tabata pa a traha ku Dibo. El a bisa ku último 2 aña e ku Dibo a traha ku otro den diferente proyekto. E ta hende fásil pa traha kuné pero ta kritiko tambe i e ke lo máksimo i Randal tambe. I p’esei nan ta haña otro. Aña pasá tambe Randal a areglá pa Dibo i a sali di 3 finalista. For di einan tabata un bon skor. “Mi tabatin e idea ku mi mester demostrá siendo ku mi no ta un di e areglistanan di un di e tumbanan ganadó. Esei ta pone sierto preshon pero di otro banda mi a bisa ku mi ta sigur di loke mi ta hasi. Ora mi hasi algu mi ta hasi bon trabou, sea ópera, toka piano òf jazz e no ta hasié si e no ta sigur di hasi algu bon. Ora mi tabata bezig ku e areglo el a dura un poko pasobra Dibo mester  a bai ‘diep’ pa su inspirashon i e tabatin duda si e ta bai òf no i nunka e ta lat asina. Pero ami no tabatin problema pasobra mi ta areglá masha lihé. Mi tabata bai su kas òf e serka mi i nos ta eksperensia un tiki. Ora e tumba tabata e ora ei mi a sòru pa e areglo”, Randall a konta Djasabra.

No ta promé areglo….

 

Esaki no ta Randal su promé areglo di tumba. El a hasi esaki den pasado. E ta konta ku na 2006 el a komponé i areglá pero no letra. Den e kaso ei tabata pa Niata Augusta. Gio kompañá i Randal a traha e tumba ful instrumental i despues a pone letra. E tabata “Biba Bida Bon” i e tumba a klasifiká den e 10 nan. E tempu ei Randal tabata biba na Ulanda. El a bin Kòrsou i komponé e tumba. Pero ora di ensayo ya Randal tabata na Ulanda bèk. Na radio el a skucha e tumba. E aña siguiente tambe el a purba ku Niata pero no a klasifiká i un otro bia mas ku Niata. Randal a bin Kòrsou na 2013 pa biba. Na 2017 Chinto Pantophlet a pidié pa un tumba. E konosé Chinto bon i el a siguié tur tempu kantando tumba. Ku Dibo mes Randal tin 2 aña ta traha. Aña pasa Dibo a sali na di 3 lugá i nan tabata kontentu pasobra tabata promé bia ku Dibo a bai ku su mes banda i Randal a dirigí.

Desaroyo di tumba

 

Randal ta haña ku e no ta haña e desaroyo di tumba ta bai lihé. Komo ta kompetensia i por eksperimentá un tiki. E meta ta ku bo ta bai pa skor i e públiko ta tende e tumba promé bia i mester gust’é. E públiko no tin chèns pa kustumbrá ku e tumba. I p’esei komo kompositor i areglista ta wak kiko ta dal. Otro desaroyo ku ta preokup’é ta e keho di tokadónan di bras. Tumba a bira basta violento ku hopi bras i esei ta kansa nan un tiki. Pero e ta kere ku mester bira mas realista ku e tokadónan di bras. Esei ta algu ku mester kuminsá papia i sòru pa e tokadónan di bras no nenga pa toka. E hendenan aki ta humano. Otro desaroyo ku ta preokup’é ta e kantidat di inskripshonnan ku a baha bastante.

 

Tumba kostoso….

 

E aña aki ku Dibo a sali rei di tumba, dos di e faboritonan ta hopi yòn i ku dos banda yòn, Randal ta spera ku esei ta duna e bandanan yòn i kantantenan mas hóben mas smak pa partisipá. Tabatin mas hóben den tumba e aña aki, meskos ku e banda Hype tambe hóben ku a klasifiká. “Mi no ta bisa ku a bira tempu pa e yònnan ‘take over’ pasobra si bo wak den e mundu di muzik internashonal, si wak ku te ainda Rolling Stone ku nan konsiertonan ta super bon bishitá. Ta e sanger nobo i esnan ku tin eksperensia mester hasi e kos. I mi ta kere ku mester wak e hóbennan i e mester bira un tiki fásil i stimulá bandanan. Ta un realidat ku tumba tambe ta algu super kostoso. Si bo ke keda ku pèrdida bo mester por karg’é. Si bo klasifiká i kai den premio ta otro. Tur hende ke bai pa klasifiká i kai den premio i no mester ta asina ku ta esnan ku ta klasifiká so ta bai pasobra e kos no ta interesante mas. Mi no sa kon e mester kambia pero e mester bira mas fásil pa bandanan lokal por partisipá sin ku e ta un stròp finansiero pa nan. Esei mi ta kere ta un kuestion ku por yuda pa inskripshonnan por subi”, tabata palabranan kla di Randal Corsen riba e punto kiko e ta kere ku mester hasi pa tin mas inskripshon di tumba.

Muzik ta su trabou….

 

Randal a studia na Ulanda i el a traha komo músiko na Ulanda. Den su kaso ta muzik so e ta hasi. Na Ulanda e situashon tabata otro pasobra e tabata duna lès tambe na algun konservatorio. Aki no tin e konservatorio ei i aki e bida ta asina ku e ke buska su  yunan for di skol bin kas mèrdia i p’esei e ta mas bezig ku muzik mas tantu mainta privá. E ta algu otro pasobra na Ulanda tin hopi posibilidat. Aki tambe tin posibilidat pero no manera Ulanda. Ora e hasi presentashon na Ulanda e por bai diferente siudat miéntras aki bo ta trein i trein i ta un òf dos presentashon por tuma lugá. Ta bin aserka ku na Kòrsou hopi músika ta traha part time. No ta un problema pa e kalidat i nan nivel pero pa plania ensayo bo tin di tene kuenta ku hende ta traha. na Ulanda tur ta músikonan profeshonal. Pero Randal ta kontentu di ta bèk pasobra e ta sinti ku  por hasi algu bèk pa su pais. E ta gusta toka muzik di Kòrsou. Randal ta  gusta proyektonan grandi, e ta gusta salsa. I na Kòrsou tin otro posibilidatnan ku na Ulanda e no tabata hasi uso di dje. Aki e no tin di splika e músikonan ora di músika di Kòrsou. Na Ulanda ora e ta bai toka tumba e tin di splika i dushi aki ta ku ta papiamentu.

 

Muzik; Pens’é bon

 

Pa esnan ku ke studia muzik Randal Corsen ta konsehá pa pens’e bon. Muzik ta un fishi i e no ta nifiká ta artista bo tei bira. Si bo por algu, lo tin trabou pero traha duru. Si bo por lesa muzik bo ta traha mas fásil profeshonalmente. Bo mester ta un bon vakman. Meskos ku ora bo bira deportista bo tin di trein hopi. Músika ta eksihí hopi di bo físika. E ta eksihí hopi dedikashon sino no hasié. Esun ku ke hasié, lo no duel bo pasobra e ta un trabou di satisfakshon. Ora bo ta den muzik e satisfakshon mesora ta di e aplouso ku ta bin. Pero e ta peligroso ser músika, si bo hasié pa e fama. Bo tin di hasié pa amor pa e músika i no pa e fama.

Selebrá e temporada largu….

 

Loke mas Randal ta gusta ta toka. Dirigí ta leuk pero e ta gusta toka mas. Den e kaso di areglá, e tabata riba un stage grandi i públiko grandi i ta algu leuk. “Ora mi ta dirigí mi ta bula bai bin meskos ku ta kantando mi ta. I meskos mi ta ora mi ta toka. ONE ta un banda ku hopi bon vibe. Ta un dushi ambiente riba stage. E temporada aki ta drùk pero dushi. Ta un selebrashon di tur e sakrifisionan den e temporada largu”, Randal a bisa.

LAGA UN KOMENTARIO

Please enter your comment!
Please enter your name here