WILLEMSTAD.- Manera EXTRA a publiká den su edishon di djasabra último, komunidat ta komportando. Bosero di e departamento di Inspekshon Ekonómiko Ronny Cornelis a konfirmá e publikashon di EXTRA i tambe a indiká ku tabatin un tendensia positivo di 25%, pues ku otro palabra un oumento positivo di 25%  di e komportashon di tantu komunidat mes i tambe komersiantenan. A konkluí esaki despues di a kompará sifranan di e di dos siman di òktober i tambe sifranan di e di dos siman di novèmber.

Di 18 pa 24 di òktober a bai un total di 62 ruta i a kontrolá un total di 82 establesimentu. Di e 82 establesimentunan aki 40 tabata na òrdu. Esaki ta igual na 49%.

A kompará e sifranan aki ku e siman di 15 pa 21 di novèmber ku ta e siman tras di lomba. Den e siman aki a bai un total di 59 ruta i a kontrolá un total di 55 establesimentu. Esaki ta similar na 74%.

Pues si kompará e dos simannan ku otro, por a mira un oumento positivo di 25% .

Esaki ta nifiká ku den e siman di novèmber tabatin ménos problema durante kontròlnan, hendenan tabata muchu mas konsiente i a komportá mas. Esaki ta konta tantu pa kliente pero tambe pa e komersiantenan.

Mirando kon e sifranan di COVID ta subiendo di un forma alarmante, ta spera ku komunidat tuma e situashon aki hopi na serio i kuida nan mes.