WILLEMSTAD.- E asosashon ‘Antilliaanse Vereniging van Makelaars in en Taxateurs van onroerende goederen’ (AVMT), ta tira un bista general di e merkado di benta i hür di kas na 2025.
E merkado di kas ta desbalansá. Kas ku ta kumpra ta bira inalkansabel pa personanan ku un entrada averahe sin kapital propio. E kantidat di kas ku ta birando mas karu, i skars tambe ta kousa ku e montante di hür den e sektor liber ta subi, i e kasnan aki apénas ta aksesibel pa personanan ku entrada mediano. Kasi no tin kas ku hür na preis mediano. Den resúmen: E merkado i e gobièrnu ta faya. Hende ku entrada mediano sin kapital propio (òf di famia) no por haña un kas mas.
Na 2026, e merkado di kas di Curaçao pa e klase medio lo ta den un fase desafiante. Aunke tin un oumento chikitu den e preis di kas, entre otro e normanan di finansiamentu estrikto hopi biaha ta keda un opstákulo grandi.
Aki ta sigui e faktornan mas importante ku ta afektá e merkado na 2026: Preis di kas haltu: E preis promedio di benta di un kas na final di 2025 a pasa e límite di cg.450.000,-. Ta spera un oumento mas pa 2026, aunke e kresementu akí ta bira ménos kompará ku añanan anterior. Pa mantené e kasnan pagabel, ta notabel ku e kasnan ta bira mas chikitu kompará ku algun aña pasá; Impuesto di transferensia / O.B: E tarifa na 2026 ta keda 6%. E tarifa mester ta progresivo kuminsando ku 2 porshento pa e promé kas / kas te ku cg.400.000,-, Di cg.401.000 te cg.500.00: 2%, Di 501.000 te ku 600.000: 6%, i mas haltu ku cg.600.000,-: 10%; Skarsedat di notario: Gobièrnu mester motivá huristanan pa sigui un kurso adishonal di lei notarial, etc. na nos universidat den orario di anochi disponibel. Ku esaki, e huristanan por traha komo kandidato notario, loke lo hasi ku e aktanan di transferensia por pasa hopi mas lihé (den dos siman) i finalmente stimulá ekonomia; Hasi palabrashon ku FIU, pa asina por "skrin" e poblashon lokal den un proseso mas rápido, pa asina e proseso por kana mas lihé; E profeshon di tasador o.g. ta basta bon kontrolá pa e bankonan komersial. Pero e mester ta un título protehá. Korte, abogadonan, ofisina di atministrashon mester por konfia riba un rapòrt di tasashon, i esei no ta e kaso aworakí.
Aktualmente tin hopi persona di mala fe ku ta traha den e área akí di tasadó, loke ta funshoná den forma engañoso i ta mantené e merkado artifisialmente haltu dor di pone balor haltu pa nan por haña un benefisio serka nan kliente. E profeshon akí mester ta regulá legalmente, pa asina gobièrnu por yuda regulá e merkado. Esaki por hasi via un título protehá òf por ehèmpel via di un registro na Kámara di Komèrsio ku ta tuma un tèst di kompetensia profeshonal promé ku registrashon einan, pa asina e konosementu mínimo ta presente.
Tur tasador ta kere tambe ku nan por tasa tur propiedat. Tasador ta un profeshon den kua eksperensia ta hunga un ròl importante. Un tasador senior mester supervisá un aspirante tasador pa prevení abusu. Si ta mira solamente e kalkulashon di O.Z.B, ta nota ku esaki no ta tuma lugá na un manera eksperto. Tur hende mester a entregá un opheshon. E úniko balorashon korekto ta di e propiedatnan resientemente kumprá. Tin demasiado rapòrt di tasashon riba merkado, kaminda bo por pone hopi pregunta.
Nota: Si por duna e propiedat real mas lihé, gobièrnu lo risibí mas impuesto di transferensia, mas kas i ‘resort’ por wòrdu konstruí, e tiendanan lo bende mas produkto ku ta generá impuesto di entrada i impuesto di transferensia riba material/produkto.
Pa regulá e merkado di propiedat, protehá e profeshon di tasador lo ta un paso hopi grandi den e bon direkshon. Afortunadamente, e Gobièrnu na maneho ta di akuerdo ku esaki, i a inisiá e proseso pa logra esaki, segun AVMT.