Marisan Pieters “Sandy” a bai Ulanda 20 aña pasá komo maestro di skol básiko i awe e ta diseñadó di bolo i tambe ta sikólogo spesialisá pa antianonan(yunan di Kòrsou). Sandy a kompartí su eksperensia for di momentu ku el a yega Ulanda 20 aña pasá te awor i kiko ta su plannan pa den futuro.

Di maestro, pa sikólogo i artista di bolo

Sandy tin 20 aña na Ulanda. Den e 20 añanan ei el a bai Kòrsou un bia so. E ta kere ku awor si e tin di bishitá Kòrsou. E ta hopi drùk. Sandy ta mama di 3 yu Saidy, Rogier i Rafael i otro aña Sandy lo kasa tambe. Na Kòrsou e tabata maestro di skol básiko. Pero no ta loke e tabata ke, e kier a bai mas leu. El a bai Ulanda pa sigui studia biologia. El a hasié tambe i a traha 8 aña komo dosente na skol sekundario na Ulanda den biologia. Tabata un temporada dushi, pero dado momentu e preshon di trabou tabata di mas; el a haña un burnout. Nèt den e tempu ei su sua a kuminsá ku su práktika di sikiater. El a puntra Sandy pa bin traha kuné. Sandy a nenga pasobra kuido no ta p’e. Pero dado momentu el a bai tòg i a bisa lo keda un aña den kuido, awe e tin 10 aña den kuido komo sikólogo. El a spesialisá den medisina sikológiko i spesialisá mas aleu den kuido di antianonan. Nan ta situá na Rotterdam Zùit i tin hende ta bin for di basta leu pa haña kuido serka nan pasobra no tur sikólogo i sikiater ta komprondé e kultura. No tur ta respetá e pensamentu di un pashènt. Si un pashènt si psigose komo sikólogo òf sikiater no por bis’e esei. Mester respetá e pensamentu di e pashènt i purba gui’é den e manera ku e tin di pensa i no trèk e sak’é for di dje i lag’é kere ku te ko’i kèns e ta bisa. Esei ta parti di e kultura. Meskos ku un mama ku ta sinta ku e desesperashon ku su yunan por wòrdu kitá for di dje pasobra e ta eduká nan segun antiano ku ta diferensiá for di esun ulandes. Tambe por mira ku hopi antiano ku ta  bai Ulanda ku nan yu, promé ku nan a bai Ulanda nan ta eduká nan yu segun e kultura di Kòrsou, e mucha ta haña straf i rekompensa si algu ta bon. na Ulanda esei ta diferente. E ta pone ku hopi hende tin miedu di eduká nan yunan. Si e mucha ta den pubertat i bo bai Ulanda kuné i tin di papia suave ku e yu, Ulanda tin asina tantu ‘prekels’ i si komo antiano no siña delantá kon eduká e yu di e sistema ku ta pas den e kultura na Ulanda, e lo ta algu hopi difísil pa e mayornan.


Diferensia di kultura…

Komo sikólogo nan tin hopi kaso di mayornan ku ta bin serka dje pa sa kiko nan tin di hasi i kon atendé, E ta duna nan konseho pa sa kon dil ku e yunan, pa sa kon nan tin di bai den kombersashon ku skol i otro instansianan pa sa kon nan tin di reakshoná i komuniká. E pida ku na Kòrsou, zùit Amérika tambe asta pasobra tin hopi hende di Colombia ku ta bai serka nan i ku ta den e mesun tipo di edukashon na e muchanan. I nan tambe ta pega. I no solamente den edukashon pasobra edukashon ta siña e mucha kon e mester ta komo persona i si e mayor mes no por haña su mes na Ulanda e ta bai pega. I kon por eduká e mucha si komo mayor, e mes ta pega.

 

 

Kombiná sikólogo i arte di traha bolo….

Sandy awor ta kombiná e trabou komo sikólogo ku trahamentu di bolo. E huntu ku David Vinkers su sua ta traha huntu. David ta traha di 8 pa 1 i Sandy di 9 pa 1 di mèrdia  i despues di 2 or di mèrdia nan ta konsiderá nan mes pashènt i no ta traha mas. Nan ta traha na un, sin pouze i niun tipo di pouze. Nan ta sòru pa ta efektivamente bezig i atendé pashèntnan. Ora nan stòp i bai for di konsultorio, ta tempu pa nan mes. I parti mèrdia siendo oranan liber pa nan mes. E trabou a bira un pashon i e peliger ta ku bo ta bezig ku bo trabou mèrdia tambe i esei a pone ku Sandy a kuminsá buska algu otro pa e hasi. Promé ku el a drenta den e mundu di bolo, su ruman tabata traha bolo. E ruman semper a keda pidié pa bin yuda pero Sandy no tabata gusta. Pero dado momentu e ruman a pidié pa hasi e ruman su bolo di hasimentu di aña pa mira si e ta gusta, i miéntras tantu Sandy ta hasi 4 aña den diseño di bolo. Su ruman mes a stòp pero Sandy no por stòp i ta spera un dia su ruman lo bin traha bolo bèk. E ruman awor ta traha prenda.

 

Hòbi a sali fo’i man….

Ta un hòbi ku a sali for di man ku ta inskribí na kámara di komersio, un negoshi kompleto. Tambe Sandy ta duna tayer di trabou, e ta traha bolo pa empresanan grandi manera Shiraf, kompanianan di outo i hopi mas. No simplemente traha bolo pero arte di bolo ta loke Sandy ta hasi. Ora un hende kont’é kiko nan ke, e ta visualis’é su dilanti, por ehèmpel e ta trahando e wikènt aki un bolo di Halloween pa un mucha. E petishon ta pa un bolo no asina ‘eng’. Sandy ya tin den su kabes kon e bolo lo mester ta. E ta pinta e diseño riba papel. Tiki tiki e ta diseñá pa e ta un algu úniko. Tin hende ta kere ku ta man mágiko Sandy tin, pero esaki ta un manera pa e laga lòs for di su trabou di sikologia. Ora e ta bezig ku e arte di bolo e ta bezig ku su man i no ku su kabes.

 

Bolo 3D

Bolo di kasamentu no ta Sandy su spesialidat. Pero e ta gusta traha bolo tres dimenshonal. Ora e hende bestèl un bolo 3D e ta un reto pe. E ta pone tur e detayenan di mas chikí riba loke e ta traha den su arte. Pa Sandy trahamentu di bolo ta manera un fiesta.

 

Mester bai Instagram

Sandy su klientenan ta hende ku ke paga pa un obra di arte i ku por kome. E tin klientenan figo ku ta antiano pero tambe ulandes. E tin hende ta bin for di Poland ku ta bin buska bolo serka dje. Tambe Sandy su tanta tabata traha bolo i su wela tabata bende e bolo dilanti di plasa. Antes ta kon e bolo ta smak, si e ta ‘moist’ i dushi pero un kos ku hopi hende ta wak awor ta pa e bolo por bai riba Instagram. I si e por bai riba Instagram, e bista di e bolo, e ora ei e ta konta. Antes ta djis saka potrèt i kla pero awendia ta henter mundu ta ‘volg’ bo fiesta i tur hende ke hasi lo mihó pa nan mesa di bolo ta úniko. Ta un asuntu serio esaki ta, segun Sandy, I p’esei pa Sandy e loke ta mira ta konta pero e bolo mester smak bon tambe. Un bolo seku ku ta bunita bo no tin nada na dje. Un bolo no ta smak dushi no ta konta. E mester tin bunita koló i bon smak. Su spesialidat no ta traha bolo di kashupete, etc., etc. E ta un artista den bolo (Cake artist). E bolo di Sandy ta e bolo básiko manera di manteka òf chukulati ku masha dushi smak, pero e adorno ta algu úniko.

 

Usa arte pa yuda pashènt 

Di maestro, sikólogo i artista di bolo kiko mas. El a bisa ku su siguiente paso ta  ku e ke kombiná dos kos den un. Terapia den forma di ‘boetseer’. Si un pashènt no por papia pasobra e ta pega den trouma, en bes di lag’é papia pa e lòs di e trouma, e ta haña e posibilidat ‘boesteer’ pa e laga kos di e trouma i miéntras e ta ‘boetseer’ den 8 òf 10 fase e ta duna su tristesa, su ansiedat forma. I asina bo ta haña 10 obra e ta mira unda e ta awor i unda el a kuminsá. Esei ta un kos ku lo yuda hopi hende. Tin hopi hende ku no ta papiadó i no por bai sinta den un stul den konsultorio i konta kiko ta pasando i na e momentu ei mester komprondé i respetá un hende ku e no ta papiadó i lag’é traha ku su mannan. I loke ta den nos kultura ta ku hopi hende no gusta papia. E a un tabú pa papia di e problema. E ehèmpel di mas bunita ku e tin ta di un hende ku tin kanser, na momentu ku e hende tende ku e tin kanser, por mir’é riba potrèt médiko pero den bo kabes e ta forma su mes, e ta haña un sierto forma i ta bon pa laga un hende duna su tristesa un forma i kiko te hasi kuné, kon ta bai dòrn’e, ki grandura e tin i asina bo ta haña hende pone su tristesa den su trabou i esei ta un manera di terapia masha bunita.

 

E muhé koló skur

“Loke mi ke bisa bosnan tur ta ku tempu ami a yega Ulanda mi no tabata pensa ku lo mi por a yega leu mes. Mi tabata un di e antianonan ku ta pensa ku ta nan kontra di mi. Nan ta wak mi otro. Tur kaminda ku bo ta, bo mes mester profilá bo mes. Mi ta bisa mi yunan ku hende muhé kolo skur, bo ta hende muhé, bo tin koló skur i bo tin di traha un tiki mas duru. Purba no solamente saka bo kara komo hende koló skur pero komo un hende ku bo ta. I esei mi ta un punto ku mi ke duna. No sak bo kabes, pasobra ora bo sak bo kabes mundu no a kaba pero mundu ta sigui i bo so ta para kubo kabes di sak. Hisa bo kabes, gloria bo kurpa pasobra semper ta bin un mañan” palabranan di Sandy Pieters.

 

 

LAGA UN KOMENTARIO

Please enter your comment!
Please enter your name here