WILLEMSTAD.- Ayera gobièrnu di Kòrsou a emití vários informashon tokante e proseso di vakunashon riba nos isla.
Entrante djamars, 6 di yüli 2021, tur studiante di Kòrsou ku ta studia afó i ta bin pasa fakansi na Kòrsou, tambe por tuma e vakuna kontra COVID-19 durante di nan estadia di mínimo 4 siman. E studiante mester por prueba ku e ta keda Kòrsou a un periodo di mínimo 4 siman, p’asina por tuma e di dos vakuna na tempu.
Loke ku basta tempu a pidi, awor si ta posibel esta persona nan na kama tambe por vakuna. Entrante djamars, 6 di yüli 2021, tur persona ku ta drumí na kama ‘bedlegerig’, ku ta deseá di risibí e vakuna, por yama Helpdesk 9345 i registrá pa un sita pa risibí e vakuna te na kas. Esaki ta eksklusivamente pa personanan ku ta drumi na kama òf personanan ku di ningun manera no por yega na e sentro di vakunashon por hasi uso di e servisio aki. ora yama pa traha e sita mester duna nòmber i fam, adrès, bario, fecha di nasementu i number di telefòn.
A hasi adaptashon den skema di vakunashon ku Moderna. Entrante djamars, 6 di yüli, di Vakunashon SEHOS-POLI ta vakuná ku Moderna solamente riba djamars i djabièrnè. Pa tur persona ku tabatin un sita kaba, òf ku mester risibí nan di dos vakuna ku Moderna tin kambionan (mester subi Facebook di gobièrnu pa tuma nota di kambio dje fechanan). Orario di sita ta keda meskos.
Debí na adaptashon dje skema di vakuna sentro di Vakunashon SEHOS-POLI ta introdusí un skema di vakunashon adaptá. Tur persona ku awor ta deseá di tuma nan promé vakuna i no tin sita ainda, mester akudí riba dia ku ta vakuná ku Pfizer. E skema di vakunashon ta lo siguiente: riba djamars i djabièrnè ta vakuna ku Moderna i riba djárason i djasabra ta vakuna ku Pfizer. Por “walk in” riba e dianan menshoná of traha un sita via Helpdesk 9345 of via www.bakuna.cw. Riba djadumingu, djaluna i djaweps, SEHOS-POLI ta sera pa públiko.
Tim di Vakunashon ta informá ku e vakuna di Pfizer ta disponibel atrobe na Kòrsou. Personanan ku ta deseá di vakuná, pero no a hasi esaki ainda, awor lo risibí e vakuna di Pfizer. Por tuma vakuna di Pfizer riba djárason i djasabra so. Esaki ta posibel for di dia 6 di yüli último.
Finalmente entrante djárason, 7 di yüli 2021, ta posibel pa mucha i hóbennan menor di edat, entre 12 i 17 aña, risibí e vakuna di Pfizer riba djárason i djasabra. Tantu e menor di edat i mínimo un (1) mayor, ku identifikashon bálido mester bai di akuerdo ku e mucha òf hóben por risibí vakuna di Pfizer. Por akudí huntu ku mayor òf tutor na e Sentro di Bakunashon na SEHOS-POLI riba e dianan ariba menshoná di 8:30 di mainta pa 5:30 di atardi.