No ta bai kambia desishon pa laga ABC-busbedrijf atendé transporte eskolar

WILLEMSTAD.-Parlamento a trata awe mainta un ‘vragenuurtje’ riba e tópiko Transporte Eskolar. Esaki a sosodé ku presensia di e ministernan van Heydoorn di OWCS i Hato remplasando minister Cooper di VVRP. Miembro di Parlamento sr. Doran a presentá un lista di reklamo di parti di shofùrnan ku ta transportá e muchanan. E linja kora di e reklamonan ta trata pago i tambe salario si òf no. Minister van Heydoorn, ku un stèm ku a parse un poko iritá, a bisa ku e ta nota masha insistensia ku transporte eskolar ta malu, pero mas i mas e ta yega na e konklushon ku mas bien a mishi ku ‘heilige huisjes’ na momentu ku a saka transporte eskolar for di ministerio OWCS i enkargá ABC-busbedrijf ku esaki.

Minister van Heydoorn a splika ku ministerio di Enseñansa no ta eksperto den transporte i p’esei a manda e parti di transporte eskolar pa esnan ku si tin bon konosementu di transporte ku ta ABC-busbedrijf. A surgi basta pregunta mustrando ku shofùrnan no ta haña salario fiho pa transporte eskolar i riba esaki e minister a splika bon kla ku niun momentu so no a bisa ku ta bai paga salario na shofùrnan. Es mas esei no ta posibel pasobra e kantidat di muchanan ta fluktua. Si paga salario fiho na shofùr anto e kantidat di muchanan baha, kòrta den e salario fiho ta surgi problema pues p’esei ta paga e shofùrnan a base di kilometer ku nan ta kore òf a base di kantidat di mucha ku nan ta transportá.

Mas aleu e minister a indiká ku sifranan ta mustra ku e kantidat di muchanan ku mester transportá pa skol a baha i ta sigui baha. Di kasi 16.000 mucha e kantidat a baha te 12 mil i algu. Pues ta kuadra ku shofùrnan ta haña ménos mucha pa transporte pero esei ta debí ku e kantidat di muchanan ta bahando.

Minister van heydoorn a pidi Parlamento pa habri wowo pasobra tin hendenan ku ta ventilá informashon inkorekto. No a kambia vehíkulo, no a kambia shofùr pues no a kambia nada. Úniko kos ku a kambia ta ku e ministerio di OWCS no ta enkargá mas ku transporte eskolar i awor esei ta den man di ABC-busbedrijf.

Finalmente minister di OWCS a bisa enfátikamente ku no ta bai kambia e desishon pa laga ABC-busbedrijf atendé ku transporte eskolar.

Minister Hato a remplasá sr. Cooper i a splika ku no tin i nunka tabatin asuntu di nominá mensual pa shofùrnan. Ta paga pa kantidat di mucha òf kilometer.