Update: ABVO analisando desaroyonan na PSB Bank

WILLEMSTAD.-Sindikato ABVO, ku ta representá trahadónan di PSB Bank ta na altura ku trahadónan a haña un presentashon di dirigentenan di e banko, asina Marlon Manuela miembro di direktiva di ABVO a duna di konosé na EXTRA.

E dirigente sindikal a splika ku nan tabata na altura ku e reunion lo a tuma lugá, pero no tabata sa e kontenido. Despues di e presentashon algun trahadó a informa ABVO i for di e momentu ei ABVO ta pone su mes na altura di e situashon. Mas aleu el a indiká ku tin kombersashon tumando lugá, p’esei nan ta wanta i no ta bai duna deklarashon riba e asuntu aki. Kosnan ta kanando bon.

150 trahadó PSB ta bai kas!

WILLEMSTAD.-Un baño di awa friu ta loke trahadónan di PSB Bank a haña despues di un presentashon ku a tuma lugá siman pasá. Ta p’esei a bai palabranan di felisitashon na minister demishonario Zita Jesus-Leito pasobra despues di bende UTS el a bende PSB Bank bou di yen promesa falsu anto awor tur 150 trahadó ta bai kas. Na palabra Sithree van Heydoorn den deklarashon na EXTRA.

Van Heydoorn ta presidente di e partido di mas grandi den último elekshon esta MFK i komo tal su partido ta formando e próksimo gobièrnu di Kòrsou. E ta di opinion ku e minister saliente enkargá ku Tráfiko, Transporte i Planifikashon a kibra tur record ku benta di propiedat di gobièrnu ku despues ta resultá ku solamente ta kontribuí na kresementu di desempleo na Kòrsou.

Riba e pregunta kon sigur e informashon di retiro di trahadónan ta el a duna di konosé ku siman pasá a tene un presentashon pa e trahadónan di PSB Bank. Den e presentashon a splika ku ta bai atendé ku tur trahadó (reken af) pasobra PSB Bank ta bira un banko kompletamente digital. E banko nobo lo tin lugá pa 50 trahadó, pero tur hende mester solisitá di nobo pa e funshonnan aki. Tur kos ta indiká ku ta esnan mas mihó den teknologia di informashon (IT) lo ta esnan ku tin mas chèns di bini na remarke pa e puestonan aki. Mas detaye den edishon di EXTRA.