Petishon di ABVO na gobièrnu

WILLEMSTAD.- Den un karta ku ABVO, e sindikato di mas grandi den sektor públiko, a manda pa minister enkargá ku Gobernashon, Planiamentu i Servisio (BPD) drs. Armin Konket nan ta hasi un petishon serio na e mandatario pa konsiderá pa duna empleadonan públiko hinter dia liber riba dianan 24 i 31 di desèmber 2018.

Den un karta fecha 20 di novèmber 2018, pues 6 dia pasá, e sindikato a hala atenshon di e minister di BPD ta mustra ku mirando ku no tin klaridat si na fin di desèmber aki ámtenarnan lo haña un gratifikashon i Pasku, ABVO ta pidi gobièrnu pa konsiderá pa duna e empleadonan públiko e dos dianan menshoná liber. ABVO ta mustra ku na lugá di duna e trahadónan mitar dia liber riba 24 i 31 di desèmber, pa konsiderá i duna hinter dia liber riba e dos dianan ei.

ABVO ta basa nan petishon konsiderando ku e dianan menshoná ta kai riba un djaluna i komo tal di e forma aki e empleadonan públiko lo por disfrutá di un wikènt largu di fiesta (long weekend).

ABVO ta spera un reakshon mas lihé posibel di e minister, asina e firmantenan di e karta ku ta Adrie Williams i Gregory Williams, respektivamente presidente i sekretario di e sindikato.

Minister Konket

Relashoná ku e tópiko aki EXTRA a drenta den kontakto ku minister Konket kende a splika ku e petishon ku ABVO a hasi ta algu ku ya kaba e tabata kontemplando. E minister a sigui bisa ku el a manda e karta di ABVO pa e departamento konserní pa asina e por haña konseho riba esaki.

Splikando mas aleu e mandatario a indiká ku práktika ta mustra ku tur aña na fin di aña i sigur ora ku e dianan di fiesta kai manera e situashon di e aña aki , kaminda e dia liber ta kai riba nèt promé òf despues di wikènt e gran mayoria di trahadó ta tuma mitar dia liber. A base di esei ku a surgi un interogatorio serka gobièrnu si ta práktiko pa habri ofisina pa kisas 3 òf 4 ámtenar ya ku sobrá a tuma e mitar dia i otro dianan liber tòg.

Minister Konket ta pendiente konseho di s departamentonan riba e asuntu aki. Mas detaye den edishon di EXTRA.