WILLEMSTAD. - For di fuentenan hopi yegá den Korte di Hustisia, EXTRA a komprondé ku Korte Superior (HOF) a stipulá hinter un siman pa trata kaso ‘Babel’. Manera ta konosí, kaso Babel ta enserá e lider polítiko di partido MFK, Gerrit Schotte i su partner Cicely van der Dijs. Nan a keda sentensia pa akto di korupshon, labamentu di plaka, falsifikashon i denunsia falsu.

E motibu ku Korte a plania un siman kompleto pa trata kaso Babel ta pa evitá ku lo mester bolbe suspendé e kaso. Si mester skucha testigu, ta buska nan pa skucha tur hende den e siman enkuestion i no mester lubidá ku ya nòmber di mayoria testigu ta konosí pa tur partido den e kaso aki.

Kontrali na e rumornan ku tabata sirkulá siman pasá ku e kaso lo keda tratá dia 24 di aprel, mester indiká ku e kaso lo keda tratá dia 29 di mei henter e siman ei te ku dia 2 di yüni.

Na e momentunan aki korte no ta tratando un asina yamá “regiezitting”, p’esei no ta deseá pa suspendé e kaso atrobe, asina EXTRA a komprondé for di su fuente.

Aña pasá ora ku e kaso a keda tratá, Korte Superior a bai di akuerdo pa tende kuater eksperto.

E investigashonnan ku mester a keda konkluí tabata pa saka afó si fakturanan hañá den kòmpiuter ta falsifiká, otro investigashon ta riba finansiamentu partidonan polítiko.

Tambe a pidi investigashon dor di un akountent forensiko pa duna un bista di e fluho di plaka pa loke ta trata e sospecho riba falsifikashon, labamentu di plaka i soborno di ámtenar.

Korte Superior a duna defensa te 26 febrüari 2017 pa presentá e kuater investigashonnan di eksperto na ministerio públiko. Ministerio Públiko ta haña un luna pa un kontra deklarashon.

For di e dia ei Korte a duna di konosé ku e kaso lo keda tratá na komienso di aprel 2017 i tur e nòmbernan di e testigunan ta konosí i entre tantu lo mester a keda tende kaba.

Pero esaki a resultá di ta dia 29 di mei dia ku ta inisiá e investigashon den korte i ta plania te dia 2 di yüni pa trata e kaso, ku e speransa ku e dia ei e kaso lo a yega na su fin pa loke ta trata Korte Superior. Despues di veredikto, tur dos partido tin e chèns pa apelá na Korte di Kasashon.

Extra a trata di haña bosero di Ministerio Públiko sr. Norman Serphos pa konfirmá e fecha, pero esei no a duna e resultado deseá.