WILLEMSTAD. - Despues di un tremendo parada di tiner, Kòrsou tin di lamantá dos morto. Un kaso di tiroteo na pia di brùg den Punda i un aksidente den tráfiko na altura di Burger King Gosiweg. For di informashonnan ku ta sirkulá na sitionan di e insidente, ta indiká ku pa loke ta trata e aksidente di tráfiko un outo lo a alkansá un motosikleta ku a resultá riba kaya i un otro outo lo mester a pasa riba dje. Mester indiká ku te na momentu ku nos ta bai publiká e informashonnan aki, no ta ofisial di polis.
Ta di lamentá ku despues di un tremendo marcha di tiner ku bon presentashon un hóben mester pèrdè su bida. Tabata algu pasá di 2’or di mardugá ku informashon ta drenta na sentral di polis ku tin un tiroteo i ku posiblemente un morto den Punda.
Paramedikonan a bai na e sitio i a resultá ku enbèrdat tabatin un hóben di 17 aña di edat ku su nòmber ta konosí pa EXTRA Digital, ku heridonan di bala na lomba, kabes i kurason i ku no ta duna señal di bida mas
Segun rumornan e krímen aki tin di aber ku problema den relashon. Hòmber yalurs a kita bida di un persona ku tabata muchu bon ku su frei. Tabatin asta un interkambio di sla i e persona ku a resultá e víktima a lo a flur e frei. E frei lo a bai bin bèk i tira e amigu mata. Polis a arestá e supuesto asesino un dos persona mas un hòmber i un hende muhé.
Pa loke ta trata e persona ku a aksidentá na altura di Burger King na Gosiweg, su situashon ta hopi kritiko.

Vershon ofisial di polis:

Topiko: Tiramentu ku Morto / Asesinato

Djasabra 25 di febrüari 2017 alrededor di 01.50’or, Sentral di Polis a dirigí un unidat na altura di brùg di ponton na e lado di Punda pa un kaso di tiramentu. Na e sitio polis a bin topa ku un homber drumi abou ku algun herida di bala na e parti ariba di su kurpa.

For di investigashon preliminar ku polis a realisá na e sitio a sali na kla ku probablemente e hòmber víktima tabata tin un diskushon ku un grupo di persona. Na dado momentu un di nan a saka un arma di kandela i lòs tiru dirigí riba e víktima ku konsekuensia ku algun di e tirunan aki a alkans’é na e parti ariba di su kurpa. E víktima -ku te na e momento aki no ta identifiká ofishalmente- a fayesé na e sitio di e insidente mes. Despues di e akto e sospechosonan a kore bai. Dòkter a konstatá morto di e hòmber aki i riba òrdu di Fiskal di Ministerio Públiko a konfiská su kurpa. Investigashon den e kaso aki ta kontinuá.

Na momento ku e víktima keda identifiká ofishalmente, nos lo informá esaki

Polis ta supliká tur persona ku por tin informashon tokante di e kaso aki, pa tuma kontakto ku polis na 917 of e liña anonimo 108.

Viktima indentifika komo D’xiane  Yoshua  Mardechelo  Ogenia,

Viktima maskulino  di  tiroteo  ku  a  tuma  lugá  awe  mardugá  na  pia  di  brùg  di  ponton  na Punda ta  konfirmá: D’xiane  Yoshua  Mardechelo  Ogenia,  nasé na  Kòrsou  19  sèptèmber  1998.   Polis  ta  supliká  tur  persona  ku  por  tin  informashon  tokante  di  e  kaso  aki,  pa  tuma  kontakto ku  polis  na  917  òf  e  liña  anónimo  108.