WILLMSTAD.- E hóben D. Lopez di apénas 19 aña, tabata den sala di korte, pa huntu ku su abogado hasi petishon pa su detenshon keda suspendé, te dia su kaso keda tratá dia 20 di òktober binidero. Lopez ta keda akusá di kometé 7 atrako armá ku violensia, huntu ku 3 otro hóben di mesun edat kuné.
Segun Ministerio Públiko, nan a kometé 3 atrako riba tokonan chines i 4 atrako riba turistanan i siudadano. Tur bia nan a hasi uso di violensia i a dirigí arma di kandela riba nan víktimanan. Nan a bai ku sèn, bòter di alkohòl for di e tokonan i for di e turistanan i e siudadanonan, nan a obligá nan baha for di nan vehíkulonan i bou di menasa ku arma, nan a bai ku e outonan, sèn i tambe nan pertenensianan.
Den e kaso anterior pro forma, fiskal Dennaoui-Simon a haña ku mihó posponé e kaso, pa motibu ku p’e tabata remarkabel ku 3 hóben di apénas 19 aña, ta kometé tantu atrako armá tras di otro den un tempu kòrtiku, kompañá ku violensia i tambe ku ta promé bia nan tur 3 ta kai den man di hustisia.
Relashoná ku tur esakinan, fiskal a pidi rapòrt sikiátriko i sikológiko di kada un di e hóbennan, pa wak kiko ta e motibu di nan aktonan i asina tin un bista kla pa wak si nan tin ku haña kastigu hubenil, a base di lei.
Segun fiskal a bisa ku ta trata di kasonan hopi serio i grave ku kastigunan di hopi aña mará na dje. E hóbennan aki por bai será, pa hopi aña largu i ora nan sali, mester sa kiko komunidat tin na nan.
Durante tratamentu di e kaso pa hasi petishon pa suspendé su detenshon, Lopez a bisa ku e no ta un gai asin’ei. Segun e akusado, e ta aseptá ku el a a kometé algun di e atrakonan, pero el a hasié pa nesesidat i ta lamentá su echonan. El a bisa ku e ta un gai ku ta traha i ke bai kaba su skol i yuda su mama. Hues a bisa Lopez ku no ta eksistí ku un hende ta mitar “gangster”. Pues awe e ta lanta bai traha, despues e ta disidí di kometé aktonan di kriminalidat.
Su abogado a duna di konosé, ku su kliente tin problema ku su salú i ku esaki mentalmente ta traha kuné. P’esei e ke bai kas, pa asina e wòrdu kuidá pa su famianan. Tin kosnan tambe ku e no tin den su sèl.
Hues na final a bisa, ku e sa ku e ta difísil pe, pa loke nan e ta pasando, pero otro banda, e tin ku tene kuenta ku e loke e turistanan i e otro siudadanonan a pasa aden i ku nan a keda basta troumatisá. Banda di esaki, nan a pone Kòrsou den un página pretu. Mirando esakinan hues a rechasá e petishon.