WILLEMSTAD.- Djamars último MEO huntu ku Aqualectra i tambe BAB a bai na un Carwash situá den Mirla Plateweg. Esaki debí ku a komprondé ku tabatin un Carwash ilegal na e sitio i ku tambe tin hòrtamentu di awa. Na nan yegada a konstatá supuesto hòrtamentu di awa i mesora a desmantelá esaki. Tambe a atendé ku e hóbennan inkluso e hóben Kevan Martina di 15 aña kual ta esun na kabes.

Ayera un biaha mas e funshonarionan a regresá na e sitio. Despues di a sinta huntu a komprondé ku e hóbennan no tin nada di aber ku hòrtamentu di awa.

En bèrdat tabatin un kranchi ku a keda kibrá i diferente hende tabata hòrta awa pero e hóbennan no tabatin nada di aber ku esaki. Nan a asta proba ku nan ta paga pa haña awa. E hóbennan aki riba forsa propio i ku yudansa di mayor a kumpra e materialnan i kuminsá laba outo pa por yega na sèn di un forma honesto.

E hóben Ruminigge Hanst di e Fundashon Hóben ku eskoho a aserká e hóbennan aki pa asina yuda nan haña e yudansa nesesario.

MEO tambe  a duna un man pa yuda e hóbennan pa nan negoshi por krese kumpliendo ku tur eksigensia stipulá den lei. A fasilitá nan ku algun tanki pa awa i tambe lo bai guia e hóbennan pa por yega na tur dokumento nesesario.

MEO lo bai apoyá e hóben aki pero ku e akuerdo ku e hóben lo no laga su skol kai i lo sigui hasi su bèst i kaba su skol.