WILLEMSTAD.- Korte di promé instansia ayera a trata kaso di e dos akusadonan J. Gosepa (18) i K. Stefania (21) ámbos akusá pa atrako armá ku violensia i poseshon di arma kandela.
Segun e akusashon, nan a kometé atrako dia 12 di febrüari 2021 na Lis minimarket, kaminda nan a bai ku e kaha di plaka ku tabata kontené 1000 florin.
E víktimanan a deklará ku e akusadonan a kore drenta kara tapá den e minimarket, un tras di otro ku arma i machete den man.
Bou di menasa nan a dirigí e arma riba e víktimanan i asina logra ranka e kasá bai kuné.
Den kámara por a mira e akusado Gosepa ku e arma den su man, miéntras Stefania tabatin e machete.
Ambos a presentá den sala di korte pa responsabilisá nan mes pa na akto.
Tur dos a ninga e akusashon. Nan a bisa ku nan no a plania e atrako i no sa unda e arma a sali.
Despues ku e akusadonan a kaba di kometé e atrako, polis a presentá i a kuminsá un persekushon.
Polis a tira den laira i grita e hòmbernan pa para, pero ámbos a sigui kore. Dado momento polis a lòs un tiru dirigí di kual e bala a alkansá Stefania na su pia. Nan a kore drenta un bibienda i polis a haña Gosepa den plafòn i Stefania bou di un kama.
Polis a haña nan ku e plaka i vários kos hòrtá.
Gosepa ayera a bisa ku e no a hasi nada. Segun Gosepa el a wòrdu preshoná pa Stefania pa kometé e akto pero e no a hasi nada.
El a bisa ku el a guli algun píldora di XTC kombiná ku mariwana, pa asina e haña mas speed. Nunka promé el a usa droga.
Nan tabatin problema finansiero serio i p’esei a disidí di kometé e atrako.
Fiskal a duna di konos’é ku Gosepa a bisa na hues komisario ku e ta atmití di a kometé e atrako.
Segun fiskal Stefania a purba hasi manera e tabata bou di preshon pero e ta ta esun ku a ranka e kaha bai kuné.
Mas aleu hues a bisa ku Stefania a purba tira tur kos riba Gosepa pero ku e tambe ta kulpabel.
Gosepa a splika ku e tin su motibu dikon el a bisa ku ta e a kometé e atrako. El a splika ku Stefania a kore bai su kas i tabata hopi paranoya. E ta un hóben di solamente 18 aña. E kier a yuda Stefania i p’esei a kore bai ku su tishùrt den su man.
Stefania a keda insistí ku e no a bin ku e plan. Ta promé bia ku el a usa e droga e dia ei i ta lamentá.
E rapòrt di Reclassering a duna di konosé ku Gosepa a keda ku trouma fo’i dia ku a tira su ruman di 16 aña mata. E kos ei a kans’é masha hopi mes. Mas aleu e akusado a duna di konosé ku e ke traha den konstrukshon i su soño ta pa e bira e mihó koredor di baiskel na mundu.
Ku 16 aña e mester a bai Brasami pa motibu ku e tabata hopi adikto na mariwana.
Segun e akusado, e ta usa droga i sa ku e ta malu, pero e tin su motibu ku e ta us’é. El a bisa ku e no ta atendé ku amigunan malu, pasó su ruman a wòrdu matá pa e motibu ei.
Fiskal a haña e akusashonnan probá i a hasi demanda di 4 aña pa ámbos akusado. Tambe fiskal a pidi pa detené Stefania ku tabata den libertat.
Hues Smith den su desishon a bisa ku e ta kondena ámbos akusado na 48 luna di kual 18 kondishonal ku periodo di prueba di 3 aña mas guia sikológiko i sikiátriko. Hues a rechasá e petishon pa laga detené Stefania despues di e veredikto.