WILLEMSTAD.- Korte di promé instansia ayera a trata kaso di un aksidente lamentabel ku morto ku a tuma lugá dia 29 di novèmber 2015 na altura di Jan Noorduynweg.

Ta trata di un aksidente  kaminda e víktima Alexis Leoncio Janga, nasé na Kòrsou dia 12 di sèptèmber 1958 a pèrdè su bida na e krusada Jan Noorduynweg, Schonegevelstraat i Brazilweg.

E víktima Janga a bira e di 15 morto den tráfiko pa aña 2015.

Pa ku esaki e akusado T. de Vries nase na Ulanda di 24 aña a presentá den sala di korte pa responsabilisá su mes pa su akto.

Tantu famia di e akusado komo esnan di e víktima tabata presente den sala di korte.

Momento ku fiskal Out tabata bai hasi e akusashon el a  bisa ku ta trata di un fayo ku e akusado a kometé den tráfiko.

Segun fiskal, riba e fecha menshoná e akusado  tabata kore riba e kaminda den su pikòp Toyota Thundra pa despues bai riba e kaminda kontrali i  dal den e vehíkulo di Janga ku a keda totalmente destruí.

Testigunan a bisa ku e akusado tabata kore bastante duru.

Ayera de Vries ku tabata bastante emoshonal a duna di konos’é ku no ta bèrdat ku e tabata kore duru pa motibu ku e no tabatin pura di yega niun kaminda.

Segun de Vries, Polisnan a relatá den un prosèsverbal ku pa su motibu a surgi e aksidente ku a kousa morto di e víktima.

De Vries a bisa ku esaki tabata e motibu ku nunka e no kier a lesa e loke Polis a skibi den rapòrt.

E hóben a duna di konosé ku te ainda e ta tende e brek di e vehíkulonan i zonido di e bentana ku a kibra.

El a konta ku e tabata para dilanti lusnan di tráfiko na altura di Cost U less.

Segun e akusado, na momento ku el a kuminsá kore direpente  airbagnan di su vehíkulo a bin dale den su kara i a sinti tur lokual a keda menshoná ariba zona.

E akusado a bisa ayera ku e no por kòrda tur kos  mas.

Hues a relatá ku tin vários kámara ku Polisnan a bai studia.

Polisnan a bisa ku nan ta pensa ku akusado tabata kore duru pero no por bisa kuantu kilometer pa ora eksaktamente.

Segun fiskal Out e no por a saka un konklushon ku bèrdat e akusado tabata kore duru, pa motibu ku no tabatin materialnan  konkreto di parti Polis pa ku esaki den e dokumentonan.

E famianan a eksigí  daño perhuisio di 14 mil florin.

Fiskal a demandá e akusado na un kastigu di 200 ora di trabou pa komunidat  mas 1 aña kondishonal sin reibeweis ku un periodo di prueba di 1 aña.

Dia 8 di yüni korte lo diktá sentensia.