WILLEMSTAD.- Korte a trata kaso di un akusado ku tabatin un infansia basta tristu. E no a presentá pa responsabilisá su mes pa su akto.  Ta trata di un hóben di 22 aña ku ta keda akusá di tabatin un kantidat di 862 gram di koka den su poder, kla pa abordá avion pa tera friu.

Segun e akusashon di Ministerio Públiko, duana na Hato a tuma nota ku e akusado, tabata basta nèrvioso. Ora ku a listr’é, nan a haña un kantidat di droga na su rant di djins.

El a atmití su kulpa i a bisa ku e ta hasi uso di su derechi keda ketu, pa evitá ku e ta hañ’é de problema. Segun fiskal e ta haña e akusashon legalmente i konvinsentemente probá.

Fiskal ta hasi un demanda di 18 luna di kual 9 kondishonal pa e akusado.

Su abogado a duna di konosé ku infansia di e akusado no tabata masha agradabel.

E no tabatin un lugá di biba konkreto i dor di problema ku tabatin kada bes den famia i no tabatin kos di kome den kas, el bai keda den internat.

El a sufri di hopi maltrato i no tabatin un bon kuido.

Despues su mama a bai kuné Hulanda, pero einan tambe bida no tabata bai bon, paso nan no tabatin un kaminda fiho pa keda.

Segun e abogado, su kliente a biba un aña largu sin un dak na Hulanda den friu i áwaseru.

Durante di e aña ei, el a trata na sobrebibí dor di hòrta kuminda i paña. Dor di esaki el a bin kai den man di hustisia. Despues di esaki e akusado a buska yudansa i a bai keda den un shèlter i tabata bai bon kuné.

Debí ku e tin miedu di represaya i a keda menasá, e no ta bisa di ken e droga ta.

Segun e abogado su kliente tin duele di loke el a hasi i ta pidi hues pa dun’é un chèns.

Hues a bisa ku e no ta mira nada pa desviá for di e demanda di fiskal i ta kondená e akusado konforme e petishon di fiskal.