WILLEMSTAD.- Un hóben ku a kaba di kumpli 18 aña i ya kaba tin un but di mas di 500 florin habrí, a hañ’é den problema ku hustisia pa motibu ku ta di dos bia polis ta gar’é ta kore outo sin reibeweis, promé ku el a kumpli e edat menshoná.

Durante tratamentu di e kaso, e hóben a presentá ku su tata den sala di korte.

Esaki pa motibu ku e ta menor di edat.

Hues  a puntra e akusado  dikon e ta kore outo sin reibeweis.

E loke ku a pone hues rabia mas, ta pa motibu ku e akusado tabata keda ketu i no tabata duna hues un kontesta konkreto.

Mirando esaki, hues a splik’é ku awor e tin e edat pa bai SDKK, pa motibu ku e loke e ta hasi no ta bon i ku esaki ta e dos bia i por kost’é su libertat.

Hues a splik’é tambe, ku e loke e ta hasi ta sumamente peligroso i si e okashoná kualke aksidente, e por resultá e i su famia hopi malu.

Tambe hues a sigui splika e hóben ku no ta pòrnada mester pasa lès pa haña reibeweis.

Despues di esaki e akusado a bisa ku e mester a bai hasi algu i p’esei a kue vehíkulo bai kuné i nèt den bògt di kas mes polisnan a par’é.

Tata di e akusado a bisa ku su yu a kue e yabi i bai ku e vehíkulo sin ku e tabata sa.

Fiskal a duna di konosé ku e hóben  tin un montante di fl 550,-  di but habrí.

Segun fiskal aña pasá tambe a gara e akusado sin reibeweis.

Fiskal a bisa ku ainda e debe ta pará habrí i no ta normal ku un hóben di e edat ei ya kaba tin un but habrí.

Mirando esaki fiskal ta  yega na un kastigu di 40 ora kondishonal di trabou pa komunidat pa e hóben i dos aña di  guia di Reclassering hubenil.

Hues a bai di akuerdo ku e demanda i a splik’é ku e bia aki, si e keda gará ta kore outo sin reibeweis, e ta bai será.