“Forward” video di sèks di menor di edat ta kastigabel

WILLEMSTAD. - Un hóben militar ku tabata stashoná aki na Kòrsou, a konfrontá problema ku hustisia, ora ku via di su “app” el “forward” un video o sea foto di sèks, kaminda ku por mira penetrashon di un hobensita o sea un menor di edat.

E hóben militar aki, manera hopi otro hende ta hasi, despues di a risibí e video via di “app” a manda e video pa su amigunan. Di un manera òf otro e video aki a yega serka su superiornan ku mesora e tuma akshon kontra di e hóben militar.

Dia 19 di òktober tras di lomba Korte Militar na Arnhem a trata e kaso i ayera dia 2 di novèmber a dikta fayo.

Abogado di e hóben militar a trese dilanti den defensa di e militar, ku no por denominá e hóben aki komo un pedofil. Ta un video ku el a haña i el a sigui manda esaki, pero den un grupo chikí. Esta no tabata konsiente ku e ta hasiendo  algu kastigabel.

No por papia di residivista i ta trata di un militar trahadó, e abogado a trese dilanti.

Fiskal a pidi 3 luna prizòn di kua 2 luna kondishonal, esta ku e militar tin di sinta un luna.

Manera menshoná, e abogado a pleita e kaso i a pidi pa no manda e hóben prizòn, pero a imponé un kastigu alternativo pa e hóben.

E tribunal di Korte Militar a konkluí e kaso i a mustra e hóben riba seriedat di e loke ku el a hasi, pero e echo ku e ta un “first offender” e tribunal a imponé un kastigu di trabou riba e militar di 36 ora ku e mester traha pa komunidat hulandes.

E echo kastigabel a tuma lugá temporada ku e militar tabata stashoná aki na Kòrsou