WILLEMSTAD.- Korte a reservá un dia spesial pa e militarnan di Kazèrne Kòrsou ku a kometé infrakshon di tráfiko. Entre nan e akusado G. Wespel (21) ta keda akusá di tabata intermediadó pa kompra di un reibeweis falsifiká pa un otro kolega militar di dje.
Wespel no tabata presente ayera den sala, pa motibu ku el a bai biba Hulanda, despues ku aki na Kòrsou e no ta den servisio mas den milisia.
Segun e akusashon, den e periodo di 6 novèmber 2019 te ku 17 febrüari 2020, el a hasi su mes kulpabel na komplisidat di falsifikashon di dokumentonan di reibeweis konsientemente pa terseronan.
Durante un kontròl di tráfiko, polis a para su kolega ku a mustra nan su reibeweis ku tabatin tur e kategorianan A.B,C i D. Polis a tuma nota ku koló di e karnèt no tabata kuadra ku esun original i tambe ku e shofùr a haña tur e kategorianan di reibeweis riba e mesun fecha. Esaki sigur no por ta posibel.
E kolega a deklará na polis ku el a paga 1500 florin na Wespel pa via un otro persona haña un reibeweis ku tur e kategorianan.
Wespel a atmití su kulpa i retirá for di e milisia di Kòrsou.
Fiskal a haña e akusashon probá i a bisa ku Wespel a tacha konfiansa di Milisia di Kòrsou i tambe Marechaussee. Mirando tur esakinan, Wespel a keda kondená den su ousensia na 3 luna di prizòn kondishonal. Periodo di prueba di 2 aña, mas 120 ora di trabou, guia di Reclassering i 3 aña ku e no por subi di rango. E superiornan di e akusadonan ku tabata den sala, a bisa ku Wespel a bai Hulanda kaminda el a solisitá pa e funshon di “ defensie”. Aki na Kòrsou e no ta den servisio mas.
Na final hues a bai kompletamente di akuerdo ku e demanda di fiskal.