WILLEMSTAD.- Ayera nochi Juan Pablo Duarte a tene nan anochi di graduashon kaminda a hasi entrega di diploma na mas ku 150 hóben ku a gradua ku éksito.

Durante di e anochi tambe a pone un lus riba esnan ku mas a destaká durante di e aña eskolar tras di lomba. Den tur e hóbennan ku a risibí nan diploma tabatin e hóben Giantailly Fecunda. Giantailly ta un hóben ku a nase siegu. Pero esaki nunka a strob’e di lucha pa su deseonan.

For di na Lauffer school Giantailly a keda risibí pa e dosente Poppy Martina ku a pone su mes kompletamente tras di e hóben aki i a bai spesialisá su mes na Ulanda pa asina por sa mas mihó kon pa dil i guia un hóben siegu na skol.

Giantailly a risibí algun material spesial ku a fasilitá su fase di siñamentu na skol.

Awor ku Giantailly a gradua e ta bai sigui dediká su mes den e mundu di kòmpiuter.

Juan Pablo Duarte mes ta orguyoso di tur e graduadonan i spesialmente e resultado final di e skol.

E skol tabatin un porsentahe di 90.1%  di e totalidat di studiantenan ku a gradua ku éksito. E mihó graduadonan tabata: Berthwin Luis (TKL), Rigobert Jean (PKL), Rushendry Marchena (PBL). I e hóben Berthwin Luis tabata e mihó graduado di henter e skol.