Hóben stazjèr atraká i tirá fo’i baranka na Westpunt!

WILLEMSTAD.- No tin duda ku nos isla ta birando un lugá hopi peligroso pa biba, ya ku kriminalidat ta kohiendo nivelnan sin presedente, kisas no ta kantidat pero si pa e impakto ku nan ta kousa den komunidat. EXTRA mester bisa ku algun dia pasá por poko komunidat di Kòrsou a hañ’é konfrontá ku su propio kaso estilo “Nathalie Halloway”, esei despues ku un duo (hòmber i muhé) defakto a sekuestrá un hóben for di riba kaya, lag’é pasa parti di un odisea troumátiko pa finalmente nan mar’é i tir’é for di baranka na Westpunt, pensando ku asina nan lo deshasí di dje i tapa e krímen.

EXTRA lo no bai den muchu detaye pa no stroba e investigashon ku ta andando pa pone man riba e dos malechornan, pero loke nos informantenan a splika nos ta ku, komo dos siman pasá e hóben stazjèr hulandes aki lo tabata kanando riba Caracasbaaiweg i dado momentu un outo ku un shofùr femenino a aserk’é i ofresé un kabe’i boto. Teniendo kuenta ku ta un deskonosí el a duna di konosé ku e lo kana numa ya ku e ta serka di yega su destino. Dor ku e tabata hopi serka dje porta, e muhé a kue su man tene i direpente a sali un hòmber for di e otro i asina nan dos a logra domin’é i hink’é den e vehíkulo kontra su boluntat.

Manera sa ta e kaso ku hopi atrako, nan a bai un mashin di ATM kuné pa e lanta plaka, pero e no tabatin mas sèn riba su kuenta.

Segun nos informantenan, den un akto kasi bárbaro e hóben aki a ser violá. Nan a tapa su wowonan, mara su mannan i pianan. Pero loke a sigui despues tabata mas kruel ainda. E duo a disidí ku pa por tapa nan krímen nan lo tin di deshasí dje persona mes. Komo tal ku su wowonan tapá, mannan i pianan mará, e duo a disidí di bai Westpunt i tira e hóben aki fo’i baranka, pensando ku aki lo ta morto sigur!

Pero pa motibunan ku t’e víktima so lo sa, el a forsagiá, i lòs man i pianan i sobrebibí e intento di asesinato aki. Segun nos informantenan, probablemente e individuonan lo a tira e persona unda kaminda ku e lo a kai den awa dirèkt. Manera nos ta bisa den bon papiamentu: No tabata su dia!

Keho a ser entregá na polis ku ta investigando e kaso aki. Manera nos a introdusí bisando, nos ta preferá di no bai den muchu mas detaye pa no stroba e investigashon. Pues por poko Kòrsou lo tabatin su propio kapítulo estilo Nathalie Halloway, e notorio kaso dje hóben ku a bin disparsé despues ku su kurpa lo a ser bentá na laman despues di un krímen.

SHARE

1 COMMENT

  1. # 1. E kos aki a shòk mi, maske ku mi a kere ku tur kos ta birando nòrmal i nada mas lo por shòk mi.
    Si no bin ku strafnan severo, lo no bin kambio!
    # 2. Mi no ta haña ku e foto di West Punt ku boso a husa ta justo, e ta mal propaganda pa e restaurant eynan.

LEAVE A REPLY