WILLEMSTAD.- Korte di promé instansia durante kasonan di infrakshon di tráfiko a trata vários kaso di personanan ku a yega korte pa hustifiká nan but.

Entre nan un hóben studiante di 20 aña ku dia 29 mart mitar di 12 di mainta a wòrdu pará riba Caracasbaaiweg na altura di e negoshi “Sherwin Williams” pa un kontròl di polis, pa motibu ku e tabatin papel pretu na glas di su Toyota Yaris pegá.

Polis a dun’é un but di 75 florin.

E hóben studiante a bisa ku polis a dun’é but riba spekulashon.

Pero fiskal a splik’é ku fo’i ora polis konstatá ku e papel ta demasiado pretu e por dun’é but mirando ku lei aki na Kòrsou, no ta permití pa tin glas pretu na e bentananan dilanti. Esaki relashoná ku atrako, kriminalidat etc.

Fiskal a bisa ku e ta tene kuenta ku e akusado ta un studiante i ta spera ku el a siña su lès.

Normalmente ora ku un hende haña but e bai korte e but ta subi.

Den e kaso aki e but a bira 100 florin, pero fiskal a lag’é na e montante di 75 florin. E studiante a pidi si e por pag’é den término i fiskal a bai di akuerdo pa e pag’é den dos luna ku ta 50 florin ku ta e mínimo ku por paga i e sobrá 25 florin.

Hues den su desishon a bai kompletamente di akuerdo ku e demanda di fiskal.