WILLEMSTAD.- Un hóben di 17 aña, tambe mester a presentá ku su mama dilanti hues pa kasonan di infrakshon di tráfiko, despues ku el a haña but pa kore skuter sin hèlm.

E hóben a konta ku e dia ei, e mester a bai tuma su resultado di skol i tabata poko lat. Esei a pone ku el a sali sin kòrda kue su hèlm.

Fiskal a bisa e hóben, ku e tin ku siña ku no mester kore sin hèlm, pasó si e kai por ehèmpel, e por terminá fatal. Mirando esaki fiskal ta yega na un demanda di 75 florin di but pa kore sin hèlm.

E mama a bisa ku tabata un sorpresa pa nan, ora ku deurwaarder a trese e invitashon na kas pa e yu presentá dilanti hues. Segun e mama, dia ku e polis a para e hóben e no a haña e papel bèrdè di e but. E agente a djis bisa e hóben wak pa otro bia e tin su hèlm bistí.

Na final hues tambe a papia ku e hóben i a bai di akuerdo ku e 75 florin di but.