UPDATE:

E víktima maskulino ku tabata envolví den e aksidente di tráfiko ku a tuma lugá djadumingu 2 di desèmber último i ku a fayesé, keda identifiká komo:

Mijael Giar Yarsmir Pietersz, nasé na Bonaire 13 desèmber 2001.

WILLEMSTAD.- Ayera alrededor di kuartu pasa di sinku di atardi, Sentral di Polis a risibí informashon di un aksidente di tráfiko ku a tuma lugá riba Rooseveltweg na altura di pòmp di gasolin na Sta. Maria. Na yegada di e unidat, nan a bin topa un mucha hòmber drumi abou ku herida grave na su kabes i tabata sangra hopi. A pidi presensia di ambulans na e sitio, ku a transportá e víktima den un situashon hopi delikado pa poliklínika.

Alrededor di 06.02’or Sentral di Polis a risibí notifikashon, ku e víktima a bin fayesé, a konsekuensia di e heridanan ku el a risibí.  For di investigashon preliminar ku polis a realisá na e sitio, a sali na kla, ku e hóben a bai krusa kaya, na momentu ku un dòmtrùk chikí tabata aserkando, biniendo for di direkshon di airopuerto i bayendo den direkshon di Palu Blanku.

E dòmtrùk a dal e peaton aki, lagando esaki ku hopi sla na kabes. Lo reserva identifikashon di e víktima, te na momentu ku famianan di un forma responsabel wòrdu poné na altura. Personal di tráfiko ta kontinuá ku e investigashon.