WILLEMSTAD.- Korementu di “quad” ta un fenómeno bastante gustá bou di hubentut. Aki na Kòrsou por mira diariamente hóbennan ku ta kore “quad” riba nos kareteranan i hopi bia di un forma iresponsabel i peligroso.

Durante un kaso di infrakshon di tráfiko, e mayornan a presentá ku nan yu hòmber pa un infrakshon ku el a kometé. Den e kaso aki, e yu hòmber di 17 aña ta keda akusá di tabata kore un “quad” sin reibeweis, seguro i belasting. El a splika hues, ku e dia ku polis a par’é, nèt el a kaba di kumpra e “quad” i a bai tèst e. Pa su di malu, nèt e momento ei e agentenan a pasa i a par’é pa kontrolá, pa despues dun’é but. Su mayornan despues di esaki, a regla tur e dokumentonan konserní i a trese nan komo prueba den korte.

Fiskal a splika e mayornan ku esaki ta un rísiko i algu hopi peligroso.

Pa motibu ku si e hóben lo a hañ’é den kualke aksidente, nan komo mayor a haña nan den hopi problema.

Mas aleu fiskal a duna di konosé, ku normal un but asin’aki lo a kosta na tur 1000 florin.

Segun fiskal e ta haña importante pa e hóben sa, ku loke e ta bezig kuné, no ta korekto.

El a bisa tambe ku e ta tene na kuenta ku komo hóben fayonan por keda hasí.

Fiskal a bisa ku e ta pasa man na su kurason i a bisa ku pa kada dokumento, e ta hasi demanda di 150 florin di but, pero kompletamente kondishonal, pa un periodo di prueba di 2 aña.

Esaki kier men ku durante di e dos aña nan aki, e hóben shofùr no mag di kometé niun infrakshon den tráfiko.

Hues tambe a papia ku e hóben i su mayornan i a bisa ku e ta bai kompletamente di akuerdo ku fiskal i ta honra su petishon.