WILLEMSTAD.- Mester rekonosé ku e bon trabou ku Minister di Enseñansa, Siensia, Kultura i Deporte, sr. Sithree van Heydoorn, ta hasiendo ta dunando fruta. Komunidat por ta testigu di e trabounan aki. Den e fin di siman ku a pasa por a tuma nota di alumnonan di e skol di fishi Nilda Pinto SBO ku ta partisipando den e trabounan di renobashon di Oranje Kleuterschool. E proyekto aki ta ser entamá bou di supervishon di Reda Sosial.

Minister van Heydoorn ta deklará ku e ta sumamente orguyoso di a supla bida bèk den e skol di fishi aki (ántes Feffik)  ya ku den komunidat tabatin gritunan den e direkshon ei. Merkado tabata i te ainda ta mustra ku tin un skarsedat di hòmber di fishi, i konsekuensia di esei ta ku tin di kontratá hendenan djafó.

Den e proyekto di renobashon di Oranje School studiantenan di e sekshon di Elektro ta enkargá ku diferente tipo di trabou manera e.o. pasamentu di kabel di kòmpiuter; kabel di telefòn; waya i kabelnan den kashi di koriente; midi koriente ku aparatonan spesial; i midi aparatonan ku ta registrá uso di koriente.