WILLEMSTAD.-  Korte di promé instansia, a apsolvé e hóben  G. Ersilia di 17 aña for di akusashon di violashon seksual di un menor di 14 aña. Esaki  despues ku a sali afó ku e menor aki mes a bai fo’i kas di su mama i provoká e akusado. Tambe korte a tum’é na malu dor di duna deklarashonnan falsu.

Ersilia ta keda akusá tambe pa atrako riba un dama turista kaminda el a ranka  su telefòn bai kuné, nèt na momento ku e  dama tabata kana riba brùg.

Pa ku esaki e akusado a deklará ku el haña mandato di un otro hóben ku e tabata kuné pa kometé e akto aki. Despues di a ranka e telefòn, el a entregá e otro akusado esaki. Polis a detené ámbos akusado di kual e otro a  keda kondená kaba pa e akto aki. Ersilia despues di un par di dia a keda poné den libertat pero ta keda deten’é  pa e kaso di violashon seksual kontra e damita.

Ayera el a presentá den sala di korte huntu ku su mama pa konta kiko a pasa. Hues a relatá ku dia 16 di mart último, mama di e damsita a bai hasi denunsia na polis ku su yu a disparsé.

El a splika ku ora el a yega kas, e no por a haña su yu muhé niun kaminda. Ora el a bai den kushina el a mira un kuchú poné riba mesa ku algu di sanger riba dje.

Esaki a hasi e situashon mas sospechoso, di kual e mama a yama polis mesora.  Inmediatamente a kuminsá un investigashon  pa sa unda e yu muhé por tabata. E mama a yama su telefòn vários bia pero sin resultado.

Tabata den oranan di mardugá ku e damita a drenta den kontakto via app ku un amigu di dje i a bis’é ku el a keda asaltá pa 3 hòmber den kas, di kual nan a chip e ku kuchú pa asina oblig’é bai ku nan. El a sigui bisa ku  tur 3 di e hòmbernan a viol’é.

Polis a drenta den kontakto ku e damita di kual esaki a konta nan mesun historia i a bisa ku e ta skondí den un hòki duru será.

Den ora nan di mainta tempran  e damita a keda hañá den área di Veeris kaminda su mama a bai busk’é.

El a deklará na polis ku el a inventá e historia, pa asina haña chèns di bai fo’i kas pa motibu di maltrato di su mama.

El a konta ku el a  bai kas di e akusado despues di a pidié pa e keda serka dje.

Segun e damita, el a sera konosí ku mama i ruman di e akusado. El a sigui konta ku na momento ku el a bai drumi, e akusado a bin den kamber i despues viol’é.

Segun e damita esei tabata promé bia ku un hòmber a penetrá den dje. El a bisa ku promé e tabata uza “dildo” dor di a mir’é riba facebook. Riba esaki Ersilia a duna di konos’é ku no ta bèrdat. El a konta ku el a konos’é damita via FaceBook. E damita a bis’é di e problema ku su mama i a pidié pa bin serka dje un ratu.

El a bai busk’é ku un tio i ora a yega anochi e damita a pidié pe keda drumi. El a bis’é ku esaki no por pa motibu ku e no ke hañ’é ku problema. Segun e akusado despues e damita mes a kita sunú i pidié kita su paña di kual aktonan seksual a tuma lugá.

E akusado a sigui konta ku despues ku e damita a drumi, el a mira den e damita su telefòn kon e tabata app e akusado su mama, hasiendo komo si fuera ta su mama bisando ku e ta haña pèrmit pa keda drumi. Mirando e deklarashon di e damita polisnan a detené e hóben mesora.

Fiskal Vicento a bisa ku e ta haña ku e akusado mester a tuma akshon na momento ku el a deskubrí ku e damita ta gaña, hasi manera ta su mama tabata app mama di e akusado konfirmando ku e por keda. Fiskal ta haña e akusashon probá i ta hasi un demanda di 12 luna di kual 6 kondishonal.

Hues Paulides a bisa mirando e akto di e damita,  ku e ta apsolvé Ersilia di  e akto di inmoralidat.

Loke si hues a aprobá ta e atrako riba e dama turista kaminda e akusado a ranka  su telefòn.

Hues a bisa ku ta trata aki di un akto hopi serio ku ta afektá nos isla.

Mirando ku Ersilia tin 120 dia será kaba, hues ta konden’é na un kastigu di 300 dia di kual 175 kondishonal ku 2 aña di prueba.

Esaki ta nifiká ku aki 5 dia e hóben por bai kas.