E ta esun promé ku mester bai riba lista pa haña banchi

WILLEMSTAD.- Ayera e  tribunal di Hof a pone ultimatum riba e tim di maneho di SDKK,  Reclassering i sikólogo pa  sinta huntu i trese un rapòrt di evaluashon mas pronto ku ta posibel, pa por tuma desishon riba libertat di e hòmber kondená na bida largu Regis Djaoen( 41).

For di aña pasá Febrüari abogado di Djaoen  mr Prevo huntu ku e kondenado, a kuminsá un proseso di revishon pa wak si Djaoen ta kla pa drenta bèk den komunidat, despues ku el a sinta 21 aña di kastigu.

Djaoen ta keda akusá di a tira  e bewaker di  fam van der Dijs mata ku su propio arma  durante ku e tabata laborá na  pòmp di gasolin Gasora dia 14 di febrüari 1999 .

Tambe el a keda akusá pa poseshon di 2 revòlver kaliber 32 i 38.; ladronisia di outo di un fiskal i  intento di asesinato riba tres agente polisial momento ku nan tabata bai hasi su detenshon dia 17 di febrüari 1999.

Djaoen a keda kondená ku su 21 aña na kastigu di bida largu. Semper el a para riba su inosensia.

Ayera durante e kaso ku a bolbe bin bèk pa wak kon leu e proseso  di revishon i resosialisashon ta, e tribunal di Hof a puntra kon ta pará ku e asuntu di banchi na  Hasselmeyer ku ta  Unid manager di SDKK, ku tambe tabata presente.

Hasselmeyer a splika ku dia 1e di yanüari 2021 nan ta haña 50 banchi na disposishon. Pero riba lista di espera tin 18 detenido ku ta wardando riba banchi.

Segun Hasselmeyer, e prosedura di nan ta ku esnan ku ta na bùrt  segun nan kastigu, ta bin na remarke pa haña banchi promé.

Hues Carmelia na su turno a bisa ku Djaoen tin hopi aña será i na su opinion e mester ta  e promé riba lista pa bin na  remarke pa  banchi promé  ku tur otro detenido.

E tribunal na nan turno, a puntra tantu Pieternella di Reclassering, Hasselmeyer di SDKK komo abogado general, kuantu tempu ta bai dura pa prepará e rapòrt di evaluashon, pa  promé ku desèmber Djaoen  por bin na remarke  pa un banchi.

Niun di e profeshonalnan  menshoná por a duna un periodo konkreto i tempu ku nan por tin un kontesta. Segun abogado general kisas por dura 3 luna pa por traha riba e rapòrt pasó mester sinta na mesa ku tur e profeshonalnan pa yega na un evaluashon.

E tribunal a bai deliberá i despues di un ratu, a regresá i bisa ku pa dia 17 di novèmber próksimo, nan ke tur kos kla riba un rapòrt pa tuma e siguiente paso i evaluá si Djaoen por haña banchi.

Nan a duna òrdu ku e promé banchi ku drenta aden den e próksimo dianan aki mester pone Djaoen komo prioridat.

Pa e próksimo kaso Hof a bisa di konta ku presensia di Hasselmeyer, sikólogo di prizòn i representante di Reclassering ku ta Pieternella.