Despues ku OM a apelá e desishon

WILLEMSTAD. - Despues ku Ministerio Públiko a apelá e desishon di e kaso ku a keda yamá “Outpost” mañan e tribunal di korte di apelashon (Hof) lo bai  deliberá si e 4 agentenan tin ku bai prizòn bèk.

Ta trata di e 4 agente polisial Dorand, Thomsjansen, Balijn i Overman ku ta keda akusá pa vários echo kastigabel.

Dia 25 di mart último, tur 4 a bolbe presentá dilanti hues komisario pa wak si ta prolongá nan detenshon, pero, siguiente dia hues komisario a tuma e desishon i a bai di akuerdo ku e defensa pa suspendé nan detenshon den e sistema di aresto domisilio i ku prohibishon di kontakto ku otronan komo kondishon.

E desishon di hues komisario no a kai den bon tera serka Ministerio Públiko, mirando e akusashonnan di kual nan a apelá e desishon inmediatamente.

E investigashon Outpost ku ta wòrdu hasí bou di responsabilidat di Ministerio Públiko Kòrsou dor di Ofisina di Asuntunan Interno (Bureau Interne Zaken) di Kuerpo Polisial Kòrsou di algun ámtenar di polis, ku ta wòrdu sospechá di a hasi nan mes kulpabel na robo den bibienda òf intento pa hasi esaki, violashon di lei di opio i abuzu di outoridat komo ámtenar, ainda ta andando.

E kuater sospechosonan supuestamente aworakí ainda ta den kustodia.

Esaki ta nifiká ku nan por tin kontakto solamente ku nan abogado.

Ministerio Públiko a resistí pa laga nan den libertat bou di kondishonnan i pa e motibu aki a apelá e desishon.  Mañan djárason e kaso lo bai keda husgá pa 3 hues  den korte di apelashon pa wak si tur 4 agente tin ku bai bèk prizòn. Nan tur su kaso lo keda tratá apart pues un pa un.