WILLEMSTAD.- Korte di apelashon a kondená e   akusado R. Pieters (55)  na un kastigu di 8 luna di kual 4 kondishonal. Ta trata di mesun kastigu ku e akusado a risibí den korte di promé instansia.

Pieters ta keda akusá di a  basha su subrino ku ásido di bateria den kara. E akusado a apelá su sentensia pa motibu ku e ta haña ku e no meresé niun kastigu.

Segun e  víktima nan ta biba riba un tereno di famia. Su mama ku ta ruman di su tio, a ofresé pa e biba den un kas bashí ku ta pará riba e tereno.

Aparentemente e tio aki  aspekto rasta, no a gusta e echo aki i tabata fèrfelá ku e víktima.

Segun e subrino, e dia ariba menshoná e i un  primu tabata limpia kurá. Despues di esaki katapila a presentá pa kue e sushinan bai kuné pero na e momento ei, e  no tabata presente.

Ora ku el a  yega, e tio a sali i kuminsá insultá nan papia malu kuné i su primu i akusá nan di a kue su hèrmèntnan.

Segun e víktima, el a kana bai den direkshon di e tio su kas, pa puntr’é dikon e ta papia asina ku nan. Aki e tio a kue e ásido di bateria i zuai esaki riba dje di kual direktamente a afektá su wowo. E víktima mester a keda transportá pa poli inmediatamente.

Durante tratamentu di e kaso e  akusado a  bisa  ku e kas ta di su mama, su tata i su rumannan i no di e víktima.

El a splika ku e tin hopi diploma i ku e por traha i no ta pidi niun hende nada. P’esei el a sali reklamá su hèrmèntnan ku tabata den kurá, pasó e no por kana ku nan riba su kabes. Segun akusado, e víktima ta saka arma pe vários bia i e dia ei tambe el a hasié. Esaki tabata e motibu ku el a eksitá i kometé e echo.

Hues a bisa di ta keda straño, pa motibu ku na polis e akusado no a deklará esaki anteriormente.

Hues a relatá, ku rapòrt sikiátriko a duna di konosé ku akusado ta adikto na koka i base i tin un estorbo mental.

Na aña 2014 e akusado a risibí un kondena di maltrato i tabata kanando den su periodo di prueba.

Abogado general ta haña e akusashon probá i ta demand’é na e kastigu ariba menshoná.

E tribunal di Hof a bai kompletamente di akuerdo ku esaki.