WILLEMSTAD.- Pa tristu ku e por zona, un di e hòfinan di mas konosí i ku a konosé aktividatnan grandi, Hòfi Biesheuvel a para bira un chiké.
Esaki funshonarionan di Xteam a konstatá ayera despues di a bai hasi un bishita den Hòfi Biesheuvel debí na molèster ku kimamentu di sushi.
Na nan yegada no por a kere nan bista di mira den kiko e hòfi a keda kombertí.
Nan a yega i topa ku un hòfi yená ku tur sorto di sushi manera entre otro outonan bieu, aparatonan elektróniko bieu, frishidèr bieu, sushi di kurá i hopi mas.
EXTRA por a komprondé ku ya pa algu tempu tin vários persona ekstranhero ku a hür apartamentunan chikitu den e hòfi patras.
Tin ku no ta biba ei mas pero a bai laga e lugá hopi sushi miéntras ku tin otro ku ta sigui bin den e hòfi diariamente.
Tambe a konstatá un krio di galiña i gai ku ya a surpasá 30 lokual ta nifiká ku e krio ta unu ilegal debí ku nan no ta disponé di un pèrmit.
Lei ta indiká ku na momentu ku bo krio di galiña òf gai bula 25, bo mester pidi un pèrmit pa esaki.
Mas aleu a topa ku un tereno kaminda tin kustumber di kima sushi.
Na momentu ku e funshonarionan tabata kana den e hòfi, a topa un edifisio kaminda ta atendé ku plantamentu i kultivashon di tauge (Nasigori).
Einan lo bai inisiá un investigashon pa tèst e awa ku nan ta usa i tambe e doñonan mester bai pidi un pèrmit pa e “fábrika”
Mas aleu e funshonarionan a parti tres diferente prosèsverbal pa tres diferente hende di kual dos tabata pa tur e sushinan tirá den e hòfi i unu pa kimamentu di sushi ilegal.
Na momentu ku e funshonarionan tabata bandoná e hòfi a mira algun pipa pasá di forma sospechoso.
A pidi presensia di Aqualectra i a sali na kla ku ta trata di pipanan di awa pasá di forma ilegal.
Pues tin hòrtamentu di awa tambe den e hòfi.
Pa ku esei Aqualectra lo kontinuá ku investigashon pa sa ken ta esun responsabel.
Esnan ku a hasi nan mes responsabel pa susha e hòfi ku tur tipo di sushi i potoshi ya a haña òrdu pa a kuminsá limpia e hòfi bèk for di ayera.