Ni Korsou ni Ulanda ta yuda

WILLEMSTAD.-  Dia 11 di novèmber Hòfi Mango ta habri su porta bek pa públiko. Despues di e áwaseru fuerte di 4 di mei último ku a kousa daño na e lugá, mester a sera temporalmente ya ku henter e infrastruktura a disparsé.

S4gun Jandino Asporaat “último simannan tabatin trabounan hasi i nos ta gradesido na e sosten risibí i ku a  konfirmá e balor di Hòfi Mango pa Korsou. Esaki a duna nos e forsa pa drecha e parke bek”.

Sinku aña pasa nan a kumpra Hòfi Mango ku e vishon pa hasié un parke nashonal pa i ku yunan di Kòrsou. Ta un sitio importante na Banda Bou i e responsabilidat pa duna bek na Kòrsou i yuda konstruí na su futuro tabata e meta di mas importante.

For di e sentido di responsabilidat aki pa e isla a skohe a parke aki, meskos ku henter e desaroyo for di su kuminsamentu, sin sosten finansiero di gobièrnu a konstruí awor ta rekonstruí tambe.

Loke si Jandino i su ruman Kenneth a hasi ta kuminsá ku kombersashonnan ku gobièrnunan di Kòrsou i di Ulanda pa huntu por sòru pa e loke a pasa aki sirbi komo ehèmpel i pa por buska solushon pa henter e isla, for di e punto di bista di konstrukshon.

E maneho di awa na Kòrsou no ta un problema lokal, pero  di henter e isla. Jandino i Kenneth a envolví un tim di ekspertonan pa amplia riba e problemátika i pa atendé i a dirigí nan mes riba e siguiente tres puntonan;

Drecha e damnan, limpia e roinan i reforestashon ku e punto prinsipal pa por evitá e desaster manera di dia 4 di mei último, den futuro.  Apesar di tur e esfuersonan di e rumannan Asporat, Ulanda a duna di konosé ku e responsabilidat ta di gobièrnu di Kòrsou i ku Ulanda lo no kontribuí ku konosementu i ekspertisio. Gobièrnu di Kòrsou di su parti a informá ku nan no tin e infrastruktura ni e medionan awor aki pa por ehekutá un plan amplio pa Kòrsou.

E rumannan Asporaat lo keda tene e proyekto aki haltu riba agènda pero miéntras tantu nan ta sigui ku su reparashon. Mas informashon riba e apertura di 11 di novèmber lo bin despues. Miéntras tantu e restorant Kultura Kòrsou, Cashutuin, Liefdestuin e distileria ta habri pa públiko.