WILLEMSTAD.- Ayera durante di un enkuentro ameno ku Prensa i invitadonan, e gerensia nobo di Holiday a introdusí nan mes.

Holiday Beach Resort and Casino tin un gerensia nobo i bou di e maneho nobo aki ku Andres Farid Patiño na kabes, tin plannan grandi pa loke ta trata futuro di e hotèl aki ku a konosé tempunan di gloria, pero tambe tempunan difísil.

Situashon ekonómiko di Kòrsou

No ta un sekreto ku ekonomia di nos pais ta hopi stanká i sigur pa e mundu hotelero esaki no ta fásil ya ku turismo no a konosé un kresementu, pero gerensia nobo apesar di esaki ke krea un ambiente familiar pa lokalnan tambe gosa di preisnan atraktivo sumamente kumbiniente i pa esei aworakí e hotèl tin preisnan mas barata ku loke tabata “Antillean rate”.

Plannan di gerensia pa ku futuro di hotèl

Hopi ta e plannan ku e gerensia aktual tin i tantu bishitantenan dje hotèl komo e públiko lokal lo tuma nota di esaki, ya komo trabounan di renobashon di kambernan i diferente área dje hotèl ya a inisiá manera ya a bisa. Loke sigur ta algu great ta ku awor e hotèl ta enfrente di Mega Pir nobo loke ta ofresé un bista sin igual i tambe posibilidatnan pa desaroyo den futuro.

Holiday Beach Resort and Casino e fin di aña aki

Pa loke ta trata restu di e aña ku a sobra i públiko lokal ta keda invitá pa bishitá e hotèl, ya komo lo bai tin ambiente i paketenan di estadia sumamente atraktivo pa nos hendenan lokal.