WILLEMSTAD,-Detenshon di e hòmber A. Van der Geld di 62 aña a keda suspend’é, te dia su kaso keda trata. Van der Geld ta keda akusá pa intento di aktonan inmoral kontra di un damsita di 6 aña. E kaso a keda presentá den pro forma pa motibu ku no tin espasio den korte pa e kaso a keda trata. Segun Ministerio Públiko e akusado a mishi ku parti patras di e damsita i tambe su parti íntimo. E hòmber di 62 aña a presentá den sala pa tende e fecha nobo ku su kaso ta bai keda trata. Na polis el a atmití di a kometé e akto i a bisa ku e no por a kontené su mes. E akusado tin problema sikiátriko i sikólogo a bisa den un rapòrt ku nan ta konsider’é ménos responsabel pa su akto nan. E la deklará na polis ku ántes e tabatin kustumber di bai klup nan kaminda e tabata bai wak muhé nan baila den panty. Ora ku e la mira e damsita den panty, su chip a brua i a pensa ku tabata un di e dama nan den e klup. Den e di dos deklarashon na polis, e akusado a bisa e no por a resistí i a mishi ku e damsita. Ta trata aki di un hòmber ku grado di inteligensia basta abou, i tambe analfabeto segun rapòrtnan sikiátriko. Rapòrt sikiátriko ta bisa tambe ku akusado no por distinguí relashon sosial for di relashon seksual. Su abogado ku ta mr Blonk, a duna di konos’é ku e kastigu pa algu asin’aki ta basta pisa. Segun Blonk, pa e tipo di personanan asin’aki ku problema mental no por apliká kastigu severo mirando ku e no ta na altura kiko e la hasi. Esaki a pone ku su abogado a pidi pa suspend’é detenshon di su kliente i lag’e bai warda dia di huisio na kas òf e por wòrdu di mèldu na Klínika Capriles. Su abogado a bisa ku no tabatin violashon ni mishimentu pa un periodo largu. Chèns pe keda kastigá ta hopi chikí mirando su problema mental.
Hues Paulides a bai di akuerdo ku e petishon, despues di a kaba di evaluá si e akusado por bolbe kometé e mesun akto, si tin chèns di huida, òf si komunidat ta shòk si e wòrdu pone den libertat. Na opinion di hues e no ta mira ku niun di esaki nan lo bai sosodé. E akusado a kometé e akto aki un biaha so i a atmití mesora. Hues a bisa ku e lo pone kondishon pa ku suspenshon di detenshon, ku e akusado no mag di drenta den kontakto ku e víktima ni su mayornan, e no mag di kometé echonan kastigabel, i tin ku sigui guia di Reclassering. E la pidi si e por bai misa, hues a bis’e basta e no ta bai topa ku e víktima ni su famia. E kaso lo keda trata dia 2 di yüni próksimo.