WILLEMSTAD.- Dia 8 òktober 2020 e hòmber di edat avansá F.M.(71) akusá di a kometé aktonan di inmoralidat ku un hobensito  (13), a keda apsolv’é di tur kulpa.

Esaki despues ku hues Verbeek a bai di akuerdo ku fiskal Dennaoui-Simon.

F.M. ta keda akusá di a laga e víktima mishi ku su parti íntimo i tambe hasi aktonan oral.

Den un deklarashon e víktima a bisa ku e mester a bisti e sospechoso kondon pa despues hasi aktonan oral kuné.

Despues ku nan a kaba, e akusado a duna e menor un montante di 25 florin. Na momento ku e menor a yega kas ku e sèn, su mama a puntr’e unda el a haña e plaka.

El a splika kiko a pasa i e mama a bai kas di e akusado pa reklam’é loke el a hasi ku su yu.

Despues e mama a bai polis pa hasi denunsia.

Polis a bai kas di e akusado i a tene un entrada hudisial.

Segun e prosèsverbal, na momento ku polis tabata interogá e hobensito, e tabata hari so.

Su mama a bisa ku ta trata di un hobensito ku tin grado di inteligensia hopi abou. Ademas e hobensito a kambia di deklarashon dos bia.

Promé el a bisa ku e hòmber a kometé e akto inmoral kuné na botika Nos Deseo i despues el a hasié kuné na altura di Napa.

Mas aleu e hobensito a konta ku e hòmber lo mester a saka kondon for di un paki di e marka Panthena.

El a bisa ku e promé bia e hòmber a haña un tiki erekshon, pero e siguiente bia e ta kere di a mira algu koló blanku den e kondon.  Polisnan ku a bai na e sitio, en bèrdat a haña e paki kondon di e mesun marka.

E akusado a bisa hues ku tur loke a keda deklará kontra dje no ta kuadra ku bèrdat. Segun e akusado el a haña e menor pia abou, sin sapatu i ku hamber.

Dor ku e ta tata di diferente yu, el a tene kompashon di e menor i a dun’é25 florin pe kumpra su kosnan.

Segun e akusado pa loke ta trata kondon, e no sa kana ku kondon te pe us’é.

El a splika debí ku el a haña ataka selebral, el a keda ku difikultat pa e por haña erekshon i p’esei ta na man di neurólogo.

Esaki a keda konfirmá tambe den un rapòrt médiko.

Fiskal Dennaoui-Simon a splika ku semper e akusado a para riba ku e no a kometé e akto.

Segun fiskal e hobensito a kambia su deklarashon na dos okashon.

E akusado tin un karta médiko ku ta bisa ku e tin problema pa haña erekshon. Durante ku polis tabata interogá e hobensito, e tabata hari so.

Ora ku polis a bai na e sitio bèrdat nan a haña e paki kondon i presis e marka ku e hobensito a bisa.

Fiskal a splika ku ta trata di un marka ku no ta hañ’é den toko. Pero e tim di polis ku mester a hasi e investigashon, a pèrdè e paki kondon i e informashonnan den nan sistema. Esaki ta bira difísil pa proba ku e akusado a kometé e akto.

Pues mirando tur esakinan e ta deklará e akusado liber di tur kulpa. Hues den su desishon a bai kompletamente di akuerdo ku fiskal.

Ayera abogado Dickens huntu ku e F.M. a presentá den sala pa pidi daño perhuisio di e kantidat di  103 dia ku e akusado a sinta den prizòn. Mirando esaki e abogado a pidi 10 mil florin  di daño perhuisio pero na final hues a honra 8 mil florin.