Polis a pèrdè informashon i material di investigashon

WILLEMSTAD.- E hòmber di edat avansá F.M.(71) akusá di a kometé aktonan di inmoralidat ku un hobensito (13), a keda apsolv’é di tur kulpa.
Esaki despues ku hues Verbeek a bai di akuerdo ku fiskal Dennaoui-Simon.
F.M. ta keda akusá di a laga e víktima mishi ku su parti íntimo i tambe hasi aktonan oral.
Den un deklarashon e víktima a bisa di a bisti e sospechoso e kondon pa despues e hasi aktonan oral kuné.
Despues ku nan a kaba, e akusado a duna e menor un montante di 25 florin. Na momento ku e menor a yega kas ku e sèn, su mama a puntr’é unda el a haña e plaka. El a splika kiko a pasa i e mama a bai kas di e akusado pa reklam’é loke el a hasi ku su yu.
Despues e mama a bai polis pa hasi denunsia.
Polis a bai kas di e akusado i a tene un entrada hudisial.
Segun e prosèsverbal, na momento ku polis tabata interogá e hobensito, e tabata hari so.
Su mama a bisa ku ta trata di un hobensito ku su grado di inteligensia ta hopi abou. Ademas e hobensito a kambia di deklarashon dos bia.
Promé el a bisa ku e hòmber a kometé e akto inmoral kuné na botika i despues el a hasié kuné na altura di otro negoshi riba Rooseveltweg.
Mas aleu e hobensito a konta ku e hòmber lo mester a saka un kondon for di un paki di e marka Panthena.
El a bisa ku promé bes e hòmber a haña un tiki erekshon, pero e otro bia e ta kere di a mira algu koló blanku den e kondon. Polisnan ku a bai na e sitio, en bèrdat a haña e paki kondon di e mesun marka.
E akusado a bisa hues ku tur loke a keda deklará kontra dje no ta kuadra ku bèrdat. Segun e akusado el a haña e menor pia abou, sin sapatu i ku hamber.
Dor ku e ta tata di diferente yu, el a tene kompashon di e menor i a dun’é 25 florin pe kumpra su kosnan.
Segun e akusado pa loke ta trata kondon, e no sa kana ku kondon i no sa usa tampoko.
El a splika ku debí ku el a haña ataka selebral el a keda ku difikultat pa e por haña erekshon i p’esei ta na man di neurologo.
Esaki a keda konfirmá tambe den un rapòrt médiko.
Fiskal Dennaoui-Simon a splika ku semper e akusado a para riba ku e no a kometé e akto.
Segun fiskal e hobensito a kambia su deklarashon na dos okashon.
E akusado tin un karta médiko ku ta bisa ku e tin problema pa haña erekshon. Na momentu ku polis tabata interogá e hobensito, e tabata hari so.
Ora ku polis a bai na e sitio bèrdat nan a haña e paki kondon i presis e marka ku e hobensito a bisa.
Fiskal a splika ku ta trata di un marka ku no ta hañ’é tur kaminda i tampoko den toko.
Pero e tim di polis ku mester a hasi e investigashon, a pèrdè e paki kondon i e informashonnan den nan sistema. Esaki ta bira difísil pa proba ku e akusado a kometé e akto.
Pues esaki ta pone ku no a ked’é nada mas di deklará e akusado liber di tur kulpa. Hues den su desishon a bai kompletamente di akuerdo ku fiskal.