WILLEMSTAD.- E akusado Kenneth Papa (55) ayera a presentá den sala di korte pa responsabilisá su mes pa su akto.
E ta keda akusá di a purba kita bida di e víktima Luisa dia 29 yüni 2020 dor di hink’é vários bia ku kuchú den su barika i a laga su tripanan keda kologá afó.
Hues a bisa Papa, tantu e komo e víktima a deklará un istoria diferente. Papa a konta ayera ku e dia ei el a yega kas fo’i trabou kushiná kaba kome. Despues el a pensa pa bai serka su amigu Luisa ku e ta yama Nilo, pasó nan a lanta fo’i chikí huntu i ta amigu pa mas di 40 aña. El a kaba wak notisia i a disidí di sali kas. Segun e akusado, nunka e ta sali man bashí pasó den pasado nan a tira atrako riba dje. Pues el a sali ku su kuchú.
El a bisa ku e sa bai 1 pa 2 bia pa aña serka Nilo paso e sa ken e ta. Semper Nilo ta sinta bou di un afdak pasó e ta huma base òf ‘soft drugs’. Segun e akusado e no ta huma ni sneif pero ta dal un tiki “drinks”. El a sigui konta ora el a yega kas di Nilo, e no tabata pafó. El a yam’é i Nilo a sali habri porta pe drenta paden. Segun Papa, manera el a drenta Nilo a bis’é awe e no ta sali for di ei den sin e tene relashon kuné i ora e kaba e ta hasié ku su ruman muhé tambe.
Segun Papa, el a puntr’é kiko e di pero a disidí di legumai i kambia kòmbersashon puntr’é si e tin ko’i bebe. Huntu nan a drenta outo di Nilo i bai kumpra alkohòl na chines despues a bai Nilo su kas bèk.
Segun e akusado nan a bolbe bai paden i Nilo a bolbe sera e porta.
Ora el a kaba basha ko’i bebe, direpente Nilo a baha su karson saka su parti íntimo i bis’é "wak wak e kos aki mi tin p’abo i bo ruman muhé”.
Segun e akusado el a bira su kara aya banda i a pensa den su mes kiko ta pasando aki. Ora el a tuma nota, el a mira ku Nilo tabata usando base. Despues Nilo a bula lanta para su dilanti i keda bis’é e kos aki mi tin p’abo. Segun e akusado el a haña e akto ei un faltamentu di rèspèt i p’esei el a rabia saka su kuchú hink’é.
Hues a puntr’é dikon e no a dal e un klap òf push’é. E akusado a bisa ku tabatin un tempu Nilo a trata na kita su bida dilanti un públiko grandi riba Plein Cafe, dor di pone kuchú na su garganta i hopi hende mester a kore bin purba kita e kuchú. El a bisa ora ku el a yega, el a mira Nilo ku un kuchú den su man ta limpia su pipa, p’esei el a sintié menasá.
Banda di esaki e akusado a bisa ku pa e tabata un faltamentu rèspèt loke Nilo a hasi.
Hues a bisa ku e víktima a deklará otro kos.
Segun Nilo e akusado a drenta paden miéntras e tabata den baño.
El a kuminsá grita “mi ta mata bu” i a hink’é promé den su brasa abou pa despues e hink’é den su barika.
Segun hues, promé Nilo a bisa e tabata den baño i despues den su kamber. A bolbe skuch’é i ora polis a konfront’é ku e deklarashon, el a ninga i a bisa ta Papa a bin riba dje i hink’é.
Nilo a bisa e no gusta hòmber, muhé so miéntras e akusado tambe a bisa meskos.
Fiskal den su rekisitorio a duna di konosé ku Papa a hinka e víktima ku hopi furia ku e konsekuensia ku e tripanan a bin afó i e karni ku ta wanta e tripanan a sker. Esei a pone ku e víktima a keda ku problema ku su tripa te ku awe i tin hopi problema pa hasi sushi. Segun fiskal Papa no a duna rèspèt na salú di Luisa ni tampoko no a tene kuenta kuné. Fiskal no a haña ku ta trata di un akto di defensa propio paso e mes a bisa ora Nilo a para su dilanti e no tabatin e kuchú ku promé el a mir’é kuné. Mirando kon grave e víktima a keda fiskal a yega na un demanda di 7 aña i a konsiderá e akto komo intento di asesinato.
Na final e akusado a bisa ku fiskal no tabata tei. Ta e ku Nilo so tabata tei i tabata sea e òf Nilo e momento ei.
Hues a bisa den su dosié tin dos istoria i no por bisa kua di e istorianan ta bèrdat. Pero ta bai pa e istoria di Papa, pasó e víktima no por a splika e motibu dikon Papa a drenta su kas hink’é manera el a deklará. Pero hues a bis’é ku esei no ta nifiká ku e ta akuerdo ku loke el a hasi.
Segun hues un hende mag di defendé su mes ora e wòrdu ataká, violá òf agredí.
Pero den e kaso aki e akusado a bisa ku e ta haña ku e víktima a falt’é rèspèt i esei no ta defensa propio i p’esei e ta barié fo’i mesa.
Hues a bisa e ta tene kuenta ku e kos no a sosodé ' zo maar" i tambe e ta tene kuenta ku e akusado no a kai den man di hustisia promé. Mirando esaki hues ta yega na un kastigu di 4 aña kitando aresto preventivo.