WILLEMSTAD. - Un kantidat di 12 víktima a presentá ayera den sala di korte, despues ku nan a hasi denunsia riba e akusado J. Goeloe (43) kual nan ta akusá di a malversá nan kada un kual a suma un total di mas di 80 mil florin na tur.
Tur e víktimanan tabata presente den sala di korte pa nan tende kiko ta bai pasa ku e plaka ku nan a duna e akusado pa bestèl nan kashi di kushina sin nunka haña esaki. Ta trata di sumanan ku ta varia entre 2 mil pa 17 mil florin.
Segun e akusashon, e akusado tabatin un negoshi di kashinan di kushina ku tabatin e nòmber “Gewoon Keukens Curaçao”, kual e tabata bestèl for di Polen. Aparentemente e tabata bende kashi den e periodo di 10 di yanüari 2018 te ku 14 di mart 2019.
Ora ku un kliente bestèl su kashi, e tabata kobra 25% na man pa hasi e pedido.
Segun e klientenan ku a bira víktima, vários di nan a paga e bestèl pero kada bes tabata tende diferente esküs ku e kashinan no a yega ainda, òf ku nan tabata pegá na Rotterdam i tin ku paga mas sèn pa nan por yega.
E tabata bisa promé ku ta entre 6 pa 10 siman e kashinan ta dura pa yega, pero despues di 6 luna ainda e klientenan no a tende nada di nan kashi.
Hues van Lieshout ta e hues ku ayera a trata e kaso, miéntras abogado mr Ornelio ‘Kid’ Martina tabata esun ku a hasi e defensa.
Hues a bisa ayera ku na polis e akusado a deklará ku e promé 5 personanan ku a hasi denunsia a bestèl nan kashi, pero nan no a paga ainda.
Hues a keda straño pa motibu ku no ta lógiko ku ta hasi bestèl sin pago.
Un di e klientenan a deklará, ku nan a bestèl despues paga, pero despues di 6 luna ainda no a tende nada di nan kashi. Tabata tende ku e barku ta na kaminda òf a keda pegá.
Na momento ku el a bai pa reklamá su sèn òf e kashi, a surgi un diskushon kual el a haña tende ku e negoshi a bai fayit.
E akusado a bisa ku su negoshi a kuminsá pega pa motibu ku e sèn ku kliente “A” tabata paga pa buska su kashi, e tabata usa pa paga e kashi di kliente “B”.
Tabata bai bon, pero despues e kosnan a pega i no por a sigui paga pa e otro pedidonan di e otro klientenan ku si a hasi nan pago manera mester ta.
El a splika ku niun momento, tabata su intenshon pa keda ku niun hende su plaka i p’esei aworakí ta dispuesto pa paga tur esnan ku ainda e tin ku kaba di paga.
Hues na su turno a splika e akusado dikon e tabata manda mail pa e personanan ku nòmber di e barku kual e ta bisa e kushina ta aden, siendo ku esei no ta e kaso.
E akusado a splika ku tabatin un bia ku e kònteiner a kai ora ku e tabata bayendo ku e merkansia den área di Saliña, di kual vários di e produktonan a kibra i òf daña.
Hues a keda poko asombrá i a bisa ku nunka e no a tende e historia ei.
Hues ta konkluí e kaso i kondená e akusado na 10 luna di kual 5 kondishonal ku un periodo di prueba di 3 aña.